Shillong, Risaw, 08: Ïa ka met jong u heprit Kyrshanbor Kharmudui, 7 snem ka rta la lap na rud surok ha khlaw Mawpat ha ka step Sngi Palei tang hapoh 24 kynta ba u la jahrngai na jan ïing sah ha Lum Myrboh, Nongrah ha ka sngi Balang ha ka por kumba 4 baje janmiet.
U Superintendent of Police ka East Khasi Hills Bah Vivek Syiem u la pynthikna ba u heprit Kyrshanbor u la shah pynïap bad ka jingtohkit mynta ka dang ïaid shakhmat.
“Ki dak ki shin ki pynpaw ba u la shah pynïap bad ka post-mortem kan sa pynpaw ïa ka dur kaba kham shai halor kane ka jingjia,” ong u Bah Syiem ha ka jingïakren bad ki lad pathai khubor.
Ki Pulit ki la pynlong ruh ka jingtohkit kaba bniah halor kane ka jingjia bad ïa ka case ruh yn sa rejistar.
“Ngin sa shong pyrkhat namarba kane ka donkam ban thaw neem da ka Special Investigation Team (SIT) bad namarba u khynnah u la shah pynïap,” la bynrap u Bah Syiem.
Katkum ka jingong jong u SP, ka jingtohkit ba malu mala ka pynpaw ba ïa ka met la shu wan buh ha ka jaka ba la lap ha khlaw Mawpat.
Haba kylli, u Bah Syiem u la ong ba ka dang kloi than ban ong ba kane ka jingjia ka don jingïadei bad ki jingjia kiba ladep, ki Pulit kin sa tohkit na baroh ki liang.
“Ïa mynta, ngam ïohi ba kan don kano kano ka jingïadei. Ka lah ban dei ka jingjia da kumwei pat namarba ha ka jingjia kaba nyngkong la lah ban tip bad la ithuh hynrei watla katta ïa kane ka jingjia kaba mynta ngin ha ban wad ksai thik pa thik,” u la ong.
Kane ka jingjia ka la wanrah ruh ïa ka jingsngewkhia ïa ka imlang ka sahlang bad ïa kiba bun ki longïing longsem.
U Bah Syiem u la ong ba donkam ïa ka jingpeitngor bad ban shim ïa ki lad jingïada, kum ka jingpyndait ïa ki CCTV, ka jingbuh ïa ki bording jingshai ha ki jaka paidbah, bad ka jingpeitngor ïa ki khyllung bad ïa ki khynnah. U la kyntu ïa ki nongshong shnong ba kin pyntip mar mar sha ki Pulit lyngba u Emergency Number 112 lada ki lap ne ïohi ïa kino kino ki briew kiba i shan khmat.
Kane ka dei ka sien kaba ar ha kaba ki khynnah rit na ka shnong Nongrah la lap ba ki shah pynïap.
Dang ha u bnai baladep, uwei u khynnah shynrang 13 snem ka rta u la shah hajir hakhmat ka Juvenile Justice Board (JJB) halor ka jingkynnh ba u donkti halor ka jingïap jong iwei i heprit kynthei ba dang 4 snem ka rta ha Nongrah Nonglum Dong Brei.
Ïa ine i heprit ba la ithuh kyrteng kum i Insaphira Lyngdoh Mawnai la pyntip ba i la jah na phyllaw ïing ha ka por 8 baje mynstep ha ka 14 tarik, Nailur. Ïa ka met jong i, la lap najan kawei ka ïing ba dang shna ha ka step 15 tarik, Nailur.
