Shillong, Risaw, 17: U nongïalam ka BJP u Bah Alexander L. Hek uba long ruh u Myntri ka Sorkar Jylla ha ka sngi Palei u la pyntip ba shen ka party kan sa pynbna ïa u kyrtong ban pynïakhun ha ka elekshon shiteng samoi ka ban sa long ha Gambegre Constituency, hadien ka jingïakynduh bad ki nongïalam ka party ha ka 21 tarik mynta u bnai.
Ha ka jingïakren bad ki lad pathai khubor, u Bah Hek u la ong ba ka party kan ïakhun beit ïa kane ka elekshon shiteng samoi bad ïathuh ruh ba ki la don ruh ar ne lai ngut kiba la pan tiket ban ïakhun na ka BJP.
“Namarba ki la pan tiket, ka party kan hap ban shim ïa ka rai ïano ban ai tiket. Kumjuh ruh, ngin sa leit ban ïashim bynta ha ka jingïalang ka ban sa long ha Delhi ha ka 21 tarik, mynta u bnai. Ngi la don ruh ka jingïakren kaba kyrpang bad ki nongïalam ban sei ïa u kyrtong na ka bynta kane ka elekshon,” u la bynrap.
U Bah Hek u la ong ba ka party kan sa shim ïa ka rai ba khatduh ïano ban ai tiket hadien ka jingïalang bad ki nongïalam ha Delhi.
“Nga kyrshan pura ïa kaei kaba phi ong ba ka BJP ka la pynbna ïa ki kyrtong jong ka kham hadien bha. Mynta ka kynti ki la khot ïa ngi ban ïakren, kumta ngin sa ïakren bad tang hadien kata, ngin sa pynbna noh ïa u kyrtong ban ïakhun ïa ka elekshon shiteng samoi ha Gambegre,” u la bynrap biang.
Haba kylli, une u Nongïalam ka BJP u la ong, “peit ka mantra ka dei ka Sorkar NDA ba la ïalam da u Myntri Rangbahduh ka ri u Narendra Modi. Ki don shibun ki skhim ba la ai na ka bynta kiba duk tam, na ka bynta ki briew kiba duk. Ki don shibun ki kam pynroi ba la leh da ka Sorkar Pdeng. Kata ka dei ka mantra jong ngi. Hynrei ka shong ha ka jingjied jong ki paidbah.”
Halor ka jingkynnoh da ka BJP na Garo Hills pyrshah ïa ka NPP, u Bah Hek u la ong, “kane ka dei ka Sorkar MDA. Ngi ruh ngi don lang hapoh ka Sorkar MDA. Ki paidbah ruh ki don la ka jong ka nia. La phi pdiang ne phim pdiang ïa ka nia jong ki ka shong ha u briew shimet hynrei ka dei ka jingsngew jong ki paidbah.”
