Shillong, Lber, 04: Ka tnat Pule Puthi jong ka Sorkar Jylla ha ka sngi Baar ka la pan por haduh ka 15 tarik, Ïaïong, 2025 ha kaba ïadei bad ka jingthawlad thawlynti na ka bynta ka jingpynkiew ïa ka tulop jong ki nonghikai skul SSA.
Ïa kane la pyntip da u President ka Meghalaya SSA School Association (MSSASA) Bah Aristotle C. Rymbai haba kren sha ki lad pathai khubor hadien ba la wai ka jingïalang bad u Commissioner and Secretary ka tnat Pule Puthi ka Sorkar Jylla u Vijay Mantri.
“Ngi la ïakren ha ka jingïalang ba lada long kaba lah ka Sorkar kan pyntreikam noh da ka Pay Scale hynrei na ka liang jong u Commissioner and Secretary u la ong ba ïa mynta ym pat lah ban ong eiei hynrei ngin dang hap ban ap haduh ka 15 tarik, Ïaïong, 2025. Ngin sa shim ïa ka rai la ngin tyrwa sha ka Sorkar da ka Adhoc Ehancement lane da ka Pay Scale Ehancement . Baroh lai tylli ki kynhun jong ki nonghikai ngi la kren shai ba ngi kham lah ïa ka Pay Scale ha kaba ïadei bad ka jingpynkiew tulop ïa ngi ki nonghikai SSA kynthup ruh ïa ki 4th Teacher,” la ïathuh u Bah Rymbai.
Ha kaba ïadei bad ka jingpynskhem ïa ki nonghikai skul SSA, u President ka MSSASA u la ong, “u Commissioner and Secretary u la pyntip ha ngi ba ka Sorkar Jylla ka la pyntyllun ïa ka kam naduh ki bnai baladep. Ngi la kyrpad ba ka Sorkar kan kham pynkloi noh ïa ka jingpynskhem ïa ngi ki nonghikai. Ngi la ai jingmut ruh ban pynkynriah ïa ki nonghikai sha ki skul kiba marjan hapoh ka Cluster Resource Centre (CRC). Lada ym don ki skul ha ki CRC ki lah ban pynkynriah sha ki CRC kiba don shajan. U Commissioner and Secretary u la pypaw ba u sngew ïahap halor kane bad ngi la pynpaw ba lada long kaba lah ban pynkloi khnang ba ki khynnah kin ym ïakynduh jingeh.”
Shwa kane, u Bah Rymbai u la ïathuh ka tnat Pule Puthi ka ladep pynkhreh ïa ka jingpynbna ban sa pynmih ha ki khyndiat sngi ban sa wan ha kaba bad ka D.El.Ed. Course kaba 18 bnai ba la pynlong da ka National Institute of Open Schooling (NIOS).
U la ïathuh ba ha u snem 2024 ka la mih ka rai na ka Iingbishar Supreme Court ba ka D.El.Ed. Course kaba 18 bnai ba la pynlong da ka NIOS kam treikam satia ban aplai ha ki kam Sorkar bad ha u Nohprah, 2024 ka Iingbishar Supreme Court ka la pynmih sa kawei pat ka rai kaba ong ba ki long kiba treikam.
“Halor ka rai ba la pynmih da ka Iingbishar Supreme Court ha ka 10 tarik, Nohprah, 2024 ka NCTE ka la phah ïa ka shithi sha baroh ki Secretary jong ka tnat Pule Puthi jong ki jylla hapoh ka ri India kynthup ha Meghalaya ha ka 27 tarik, Kyllalyngkot 2025 la bthah ba ki Sorkar Jylla kin pynmih ïa ka Jingpynbna ba ka D.El.Ed. Course kaba 18 bnai ba la pynlong da ka NIOS ka treikam bad ki nonghikai ki lah ban aplai ha ki kam Sorkar kiba lait bad ha ki Govt. Aided School,” la ïathuh u Bah Rymbai.
