Shillong, Naitung, 24: Ki Pulit ka Ri Bhoi ha ka sngi Balang ka por kumba 3.05 baje mynstep ki la ioh bat ar tylli ki kali Pickup kiba don ïa u number TR 05/F-1909 bad TR 04/D 1920 ha kaba la ioh kurup 45 song u Ganja uba don ka jingkhia haduh 236.89 kilogram. Halor kane, ki Pulit ki la kem noh ia uwei uba donkti.
Ka jingioh bat ïa ki ar tylli ki Kali Pick-up bad ioh kurup ïa u Ganja ka dei lyngba ka jingïatreilang jong Pulit na Khapmara PIC bad ka Anti Narcotic Task Force (ANTF), Ribhoi District kaba ki la pynap shrip ha Lumdiengngan kaba hap ha surok Shillong By-pass lane ka National Highway-44 ha Ri Bhoi District.
U SP ka Ribhoi u la iathuh ba kawei ka Kali ka la phet sha ka thain Bhoirymbong bad kawei pat ka la phet sha Umeit bad ha ka jingiakhtong kaba jur la ioh ban bat ïa ki ar tylli ki Kali Pick-up bad la iathuh ba u nongniah bad ia u nongbud jong ka kaba don ïa u nombar TR 05/F-1909 ki la lait phet da kaba shim kabu ia ka jingdum jong ka miet.
U nongniah jong ka kali kaba don ïa u number TR 04/D 1920, uba la shah kem ha ki Pulit dei uba la tip kyrteng kum u Supan Chakma, 25 snem ka rta na ka shonong Nalkata ba hap ha ka Pecharthal Police Station, West Tripura.
Halor kane ka jingjia, ki Pulit ki la pyngngat ha ki kyndon jong ka NDPS Act ba la pynngat kyndon ha Umïam Police Station bad ka jingtohkit halor kane ka dang ïaid shakhmat khnang ban ioh kem ruh ïa kiwei kiba donkti ha kane ka kam beaiñ.
