Shillong, Risaw, 30: Watla bun sien ka jingiakynduh jong ki ASHA kiba don hapoh ka shatri jong ka Meghalaya Asha Workers Unions (MAWU) ia ka Myntri ka Koit ka Khiah ka Dr. Mazel Ampareen Lyngdoh kam shym la ai jinghun satia ia kane ka kynhun namarba kam shym lah satia ban ai ia ka rai halor ki mat jingdawa jong ki.
Kum ban shu kdew hangne, na ka liang jong ka Union ka la buh ia ki lai tylli ki mat jingdawa hakhmat jong ka Sorkar kaba kynthup halor ka jingdawa kyntiew tulop, halor ka mat ba lada pang ne shitom ki ASHA kim donkam ban siew pisa eiei hynrei dei ban kynthup beit da ka MHIS Card bad kawei pat ka mat kaba kham kongsan ka dei ka jingshah wengkam jong ki ASHA.
Ha ka jingiakren bad ki lad pathai khubor hadien ka jingiakynduh ia ka Myntri ka Koit ka Khiah, ka nongaibuit jong ka Meghalaya Asha Workers Unions ka Kong Soni Kharjana ka la iathuh ba ka Union kam hun satia ha ka jingiakynduh bad ka Myntri namar ba kam shym la lah ban ai ia ka jubab kaba pynhun ia ki.
Na ka liang President jong ka MAWU ka Kong Mira June Myrsing ka la pynbna paidbah ba naduh mynta ka lah sngi U Blei ki ASHA kin shongthait na ka kam kaba ki trei bad ki ap ia ka rai ka ban mih ha ka 6 tarik Naiwieng ha ka jingialang ka ban sa long hapdeng u Myntri Rangbah ka Jylla u Conrad K. Sangma bad ka Myntri ka Koit ka Khiah ka Dr. Ampareen Lyngdoh halor ki mat jingdawa jong ki ASHA.
