HADUH U RISAW, 2023 AIPOR ÏA KA SORKAR
Shillong, Naitung, 24: Ki nongtrei jong ka EMRI-108 ha ka Lah Sngi U Blei ki la aipor ia ka Sorkar Jylla haduh u bnai Risaw, 2023 ba kan pynkiew noh ia ka jingsiew tulop bad ban ai ruh ia kiwei kiwei ki jingmyntoi, kum ka shuti, ka Medical Insurance bad ka Provident Fund (PF).
Kane ka sien kaba lai ba ki nongialam jong ka Meghalaya EMRI Workers Union (MEMRIWU) kin pynsngew ia ki jingdawa sha ki tyndong skhor jong ka Dr. Ampareen Lyngdoh hadien ba ka la shimti kum ka Myntri ka Koit ka Khiah jong ka Sorkar Jylla.
Ha ka jingïakren bad ki lad pathai khubor, u Adviser jong ka MEMRIWU, u Bah Roypar Kharraswai u la ong, “naduh u bnai Jylliew ba ka Sorkar Jylla ka la pynkut noh ia ka kontrak bad ka kompeni GVK, ia ka EMRI-108 la pynkhamti sha ka National Health Mission, Meghalaya ban pyniaid shipor naduh u Naitung haduh u Nailur, 2022 hynrei mynta la mih sa u bnai Naitung, 2023, kaba long shi snem kynthih, hynrei ka Sorkar kam pat lah satia ban shim rai eiei halor kane.”
Haba pynpaw ia ka daw kaba pynlong ia ka Union ban pynsngew ia ki mat jingdawa sha ka Sorkar, u Bah Kharraswai u la ong, “naduh ba ka NHM, Meghalaya ka la shimti ban pyniaid ia ka EMRI-108, ngim ju ioh shuh ia kino kino ki jingmyntoi kata, naduh ka shuti, ka Medical Insurance bad ka Provident Fund. La shi snem kynthih ngim ju ioh shuh ia kine ki jingmyntoi. Watla ki kam ki iaid beit naduh ba la shimti da ka NHM hynrei ka jingsiew tulop ka long kaba rit bad nalor kata ki jingmyntoi kiba ngi dei ban ioh ngim ju ioh shuh.”
Haduh mynta ki don 250 ngut ki nongtrei jong ka EMRI-108 kiba trei ha baroh kawei ka Jylla ban ai jingiarap kyrkieh ia ki paidbah haba ki iakynduh ia kino kino ki jingjia kiba donkam jingiarap kyrkieh.
U Bah Kharraswai u la iathuh ba ka Union ka la pynsngew ia ka jingpynkiew tulop hakhmat u Managing Director jong ka NHM ha ki bnai Naiwieng, Nohprah bad Kyllalyngkot hynrei u MD u la pan por ban sa pynkiew ia ka tulop hadien katto katne bnai.
Nalor ka jingdawa ban pynkiew ia ka tulop, u Bah Kharraswai u la iathuh ba ka Union ka la pynsngew ha ka Myntri ka Koit ka Khiah ha kaba iadei bad ki jaka sah ne ki Quarter jong ki nongtrei ka EMRI-108 kiba la jot, ki bym don wat tang ka bording, kiba la jaw um ka sad bad kiba buh ha ka jingmynsaw ia ki nongtrei.
U la iathuh ba ka Union ka kwah ban leh ia ki Refresher Traning ia ki nongtrei kiba dang wan thymmai kumba ju leh mynshwa manla ka hynriew bnai hynrei naduh ba la shimti da ka NHM kane ka jingai jinghikai kam ju don shuh mynta la jan shi snem kynthih.
Haba kylli, u Bah Kharraswai u la ong, “ngi kwah ia ka Sorkar ba kan shimti hi noh ia ka EMRI-108 namarba ka Sorkar ka la ai jingkyrshan pisa haduh 90 percent. Mynta la 11 bnai naduh ba ka NHM ka la pyniaid ki kam ki iaid beit bad ngi shem ruh ba kam don jingeh eiei ia ka Sorkar ba kan pyniaid hi ia kane ka kam.”
“Watla ka Myntri ka Koit ka Khiah ka la pynpaw ba ka Sorkar ka shem jingeh ban leh ia kita, hynrei ngi la iakren ruh lada ngin shu long tang kum ki nongtrei bashipor mynta la 15 snem kynthih ka shem jingeh shibun ban trei ia ka kam nalor ba ka jingsiew tulop ka long kaba rit. Ngi kyrpad ia ka Sorkar ba la kumno kumno ka dei ban pynjanai noh ia kane ka kam namar kiba bun na ki nongtrei jong ngi ki shem jingeh.
Ka Myntri ka Koit ka Khiah ha ka jingïakren bad ki lad pathai khubor ka la iathuh ba kum ka Sorkar kan sa iakren bad ka NHM ha kaba iadei bad ki jingdawa ba ka MEMRIWU namarba ka Sorkar hi kan ym lah ban shim ia kano kano ka rai na ka daw ba ki nongtrei ka EMRI-108 ki dei ki nongtrei jong ka Kompeni ym ki nongtrei sorkar.
Ka la iathuh ruh ba kan iakynduh biang ia ki nongialam ka MEMRIWU ha u bnai Risaw, 2023 ban iakren halor ki jingtyrwa bad kumjuh ruh ban iada ia ka kam jong ki nongtrei ynda la shimti thymmai da kiwei pat ki kompeni ia ka EMRI-108.
