Shillong, Nohprah, 10: Ki dkhot ka Jaiñtia National Council (JNC) ha ka sngi Balang ki la pynlong da ka jingïakhih kaba jaijai hakhmat ka ophis u Deputy Commissioner ka East Jaiñtia Hills ban pynpaw ïa ka jingpyrshah halor ka jingtyrwa jong ka Shree Cement Private Limited ban tei ïa ka Integrated Cement Plant ha ka shnong Daistong, East Jaiñtia Hills.
Ka seng ka la kynnoh ruh ba ka Sorkar Jylla kam shym la leh eiei halor ka jingdie jaka beaiñ kaba long pyrshah ïa ka Meghalaya Land Transfer Act.
La sakhi ruh ba ki dkhot ka seng bad ki paidbah ka shnong Daistong ki la rah ïa ki plakad ba pyrshah ban shna ïa ka karkhana pynmih dewbilat bad ki lama iong.
Uwei na ki nongshong shnong ka Shnong Daistong ha ka jingïakren bad ki lad pathai khubor u la ong bun ki mar rep ki seisoh bha ha ka shnong Daistong. “Ha ka iew Pyngkat ki paidbah na Khliehriat ki kham mon ban thied ïa ki jhur kiba mih na ki shnong ka Elaka Nongkhlieh. Bun ki jingmyntoi. Hynrei ka jingwan jong ka (karkhana) kan pynsniew ïa ka mariang, kan pynsniew lut ïa ki um ki wah ba ki paidbah ki ring um dih bad sha ki pynthor kba,” u la ong.
U la ong ba lada wan sa ka karkhana pynmih dewbilat kan ktah ym tang ïa ka shnong Daistong hynrei wat ïa ki khyndai tylli ki shnong kiba don ïa ki kper ki phrah, ki hali ki pynthor bad kiwei kiwei.
U la kynnoh ruh ba u Waheh Shnong u la ïaid lait na ki kyndon jong ka shnong da kaba ai No Objection Certificate (NOC) khlem ka jingtip jong ka Dorbar Shnong hynrei u la ai hi tang marwei.
“Ha ka 2 tarik, Nohprah, 2025 ha ka Dorbar ngi la ïakren ïa kane ka mat bad ngi la pynhiar shuki ïa u Waheh Shnong bad la thung Waheh Shnong thymmai ïa u Bunlang Pyrngap bad Secretary Shnong ïa u Alenbai Sukhlaiñ,” u la ong.
U la ïathuh ba ha ka 8 tarik, Nohprah, la bthah ïa u Waheh Shnong barim bad ïa u Secretary barim ban aiti noh ïa ki kot ki sla bad ïa ki muhor sha ki nongkitkam ba thymmai jong ka shnong hynrei ki la kyntait mardor.
