Shillong, Nohprah, 08: Ka Khasi Students Union (KSU) ha ka Sngi u Blei ka la rakhe ïa ka lyngkhuh sngi ïap kaba 31 snem jong u Bah Bull N. Lyngdoh uba la long u President barim jong kane ka seng ki samla pule da kaba leit buh syntiew hakhmat u durmot uba ka seng ka la tei pynsah jingkynmaw ha Malki, Shillong.
Hadien ka jingbuh syntiew da ki nongïalam ka Seng Kmie bad ki nongïalam jong ki Circle bad ki Unit la pynbud pat sa ka jingduwai da i Kong Hana Lyngdoh, iba dei i hynmen kynthei jong u Bah Bull bad ka jingkren ki nongïalam jong ki Unit bad ki Circle bapher bapher ka KSU.
U President ka seng u samla Lambokstarwell Marngar haba kren ha kane ka sngi u la ong, ‘kiei kiei kiba une u nongïalam ka KSU u la ïalam lynti, u la pruiddak bad kaba kongsan ka long ba u pynkynmaw ïa ngi ïa ka jinglen lade, ka jingïaishah ban tei ïa ka ri bad ka jaidbynriew.”
“Ha kito ki por (ba mynshwa) kiba bun ki kynthoh bad ki beiñ ïa ka jingïalam bad ki kam kiba u Bah Bull u la leh. Hynrei ynda u la khladnoh na kane ka sla pyrthei, ki jingïaroh ki wan ba kat une u nongïalam ym ïoh shuh,” u la ong.
“Kum ki dkhot ka KSU haba ngi trei bad ngi pynsngew ïa kano kano ka ishu ki ju mih ki nongkynthoh bad ki nong beiñ. Nga kyntu ïa ki paradkhot ngim dei ban pynsngap bad ngim dei ban pynsngew kum ïa kita hynrei ka kam ka jong ngi ka long ban aiti met bad mynsiem ban ïakren bad ban ïakhun na ka bynta ka jingshong shngaiñ jong ka ri bad ka jaidbynriew,” u la ong.
U la ong ruh haba ka seng ka dawa ïa ka sorkar ban pynbha ïa ki aiñ ki kanun hakhmat ka Sorkar hynrei da ki mukotduma la pyrshang ban thep ïa ki dkhot.
“Haba u Bah Bull u shim da ka lynti ban ïakhun pyrshah la thep da ki mukotduma ïa u Bah Bull kumba la thep ïa ki lehnoh bad la shim ba u leh be-aiñ. Ka rukom pyrkhat jong ka Sorkar haduh kine ki sngi ngi dang ïakren ïa kajuh shi kajuh,” ula ong shuh shuh.
“Haba ngi shim ïa ka aiñ ha ka kti la ñiew ïa ngi ba ngi leh beaiñ. Ha khmat ka Sorkar kita ki kam kiba ka KSU ka leh ki lah ban long be-aiñ hynrei na ka bynta ka jaidbynriew ka dei ka aiñ ban shngaiñ na kawei ka pateng sha kawei pat ka pateng,” la kynthoh u President ka KSU.
