Shillong, Nailur, 05: Ki Pulit ka East Khasi Hills ha ka sngi Thohdieng ki la kem ïa uwei u rangbah ba la tip kyrteng kum u Bah Mebanshem Snaitang, 25 snem, uba sah ha Pohkseh, Shillong ba la synran lang da ki briew kiba riam jaiñ ïong kum ki nongpahara hajan ka Main Secretariat, Shillong.
Ki jingkem jong ki Pulit ia u Bah Mebanshem Snaitang ka long hadien ba ki Pulit ki lap ïa ki lai tylli ki kali tah ïit ïong kiba pynïeng hajan ka Shopper’s Stop, IGP ha ka por kumba 2:30 baje noh phai sngi.
Ki lai tylli ki kali ki long kawei ka kali Audi A4 (rong saw) bym pat don ia u registration number, kawei ka kali Scorpio N (rong ïong) kaba don ïa u nombar ML05-0309 bad kawei ka kali Toyota Innova (rong ïong) kaba don ïa u registration number T0922ML7411A.
U Superintendent of Police ka East Khasi Hills Bah Vivek Syiem ha ka jingïakren bad ki lad pathai khubor ha ka por janmiet ula ïathuh ba ïa u Bah Meban Snaitang la rah noh da ki Pulit sha Sadar Police Station ban pynlong ïa ka jingtohkit
Ha ka jingkhynra ïa kine ki lai tylli kali la lap ba kawei napdeng jong ki, la pyndait ïa ka Siren bad baroh lai tylli ki kali ki dei kiba la long trai da u Bah Mebanshem Snaitang.
U SP u la pyntip ba ha kine ki kali la shong da ki 12 ngut ki briew kiba riam jaiñ ïong kiba dei ki nongpahara jong u Bah Snaitang. Na ka kali Scorpio ki Puilt ki la lap san tylli ki ki suloi Air Gun, ar tylli ki Air Pistol, 6 tylli ki Magazine, 2 tylli ki laptop, 5 tylli ki Hand Set bad ki number plate ka jylla Assam.
Shuh shuh u SP u la iathuh ba ka jinglap ïa ki Air Gun na ka kali Scorpio ka la pynsuba ïa ki Pulit ba kine ki briew ki lah ban pyndonnkam ha kaba pyntieng pynsmiej ïa ki paidbah.
Shwa ban shah rah sha thanat, u Bah Snaitang ha ka jingïakren bad ki lad pathai khubor ula ïathuh ba ki tiar ba la shah kurup ki dei tang ki Air Gun bad buh jingkylli ruh ïa ki bor Sorkar kiba kurup ïa ki da kaba ong, “kine ki dei tang ki Air Gun. Hato ka don neem ka kyndon ba ka Sorkar Meghalaya ban kurup ïa ki Air Gun?”
U SP la ïathuh ba ki Pulit ki la pynngat da ka case halor ka jingleh Pulit nongsynran, ka jingpyntieng bad hapoh ka Arms Act.
U SP u la pyntip ruh ba ki Pulit kin sa pynlong ïa ka jingtohkit kaba bniah halor ka jingpynieng ïa kitei ki lai tylli ki kali tah iit iong hajan ka dukan Shopper Stop kaba don marpyrshah ka Main Secretariat, Shillong bad khamtam eh ïa ka jingdon jong ki suloi Air Gun hapoh kali.
Haba kylli, u SP u la ïathuh ba ha ka jingtohkit kam paw eiei ba u Bah Snaitang un ïa don bynta ha kano kano ka kynhun senglehnoh.
U la ong ba ïa ki Air Guns ba la ïoh kurup yn sa phah sha Forensic Laboratory ban pynthikna la ki long kiba khlaiñbor haduh katno.
