Shillong, Naitung 02: U MP jogn ka Voice of the People Party (VPP) na Shillong Seat u Dr Ricky AJ Syngkon ha ka Lah Sngi U Blei u la kyntu ïa ka Sorkar Pdeng ban tuklar lem na ka bynta ban shna pynbha ïa ka surokbah National Highway-06 ha East Jaiñtia Hills District bad kiwei ruh ki surok ha ka jylla.
Ha ka dorkhas ba la aiti ha u Myntri ka tnat Road Transport & Highway u Nitin Jairam Gadkari ha ka 1 tarik Naitung, u Dr Syngkon ula ong, “nga kyrpad ïa ka ophis jong phi ban sngewbha tuklar bad shim mardor ïa ki sienjam ba donkam halor kane ka kam khnang ba kan weng ïa ka jingeh jong ki paidbah ka Jylla ba la kdew haneng”.
U MP ula ong ba ka NH-06 ka dei ka surok ba kongsan bha kaba ïaid lyngba ka Jylla Meghalaya, Assam, Tripura bad Mizoram kumta ka la donkam ban pynbha noh ïa ka.
Ka surok NH-06 ka pynïasoh ïa ki sor kiba kongsan ha ki saw tylli ki Jylla ba kynthup ïa ka Jorabad, Shillong, Jowai, Silchar, Aizawl, Agartala bad kut hajan ka khappud India-Myanmar.
U la ong ba ki bynta jong ka surok kiba hap hapoh ka East Jaiñtia Hills District ka dei kaba la jot rathai bha khamtam ha ki bynta naduh Jowai haduh Ratacherra ha kaba ki nongleit nongwan ki hap ban mad ïa ka jingsohsat tang na ka jingsniew ka surok.
“Ka jinglong jingman ka la nang sniew shuh shuh ha ka por lyiur bad ki briew ki ju sahkut da ki sngi ha surok ban poi sha ka jaka ba ki thmu ban leit. Kane ka la ïaid la katto katne snem bad ka la wanrah ïa ki jingeh ba khraw na ka jingduh kamai kajih bad wat ka jingduh ki mynsiem briew,” ula ong.
