Shillong, Nailur, 4: U Myntri Rangbah ka jylla u Conrad K Sangma ha ka sngi Palei u la pynsngew ha u Myntri ka tnat Kam Pohiing jong ka Sorkar Pdeng u Amit Shah ban mynjur noh ïa ka jingpyntreikam ïa ka Inner Line Permit (ILP) ban khanglad ïa ka jingwan buhai shnong beaiñ jong ki mynder na ka ri Bangladesh lyngba ki khappud jong ka jylla Meghalaya
U Sangma u la kyrpad ruh ban thaw kyrpang ïa ka Meghalaya Cadre, ban pynrung ïa ka ktien Khasi bad Garo ha ka Khyrnit Baphra jong ka riti synshar ka ri India bad ban ainam ïa kawei na ki ka surok ha Delhi ha ka kyrteng jong u Purno Agitok Sangma uba la khlad noh.
U Myntri Rangbah u la ong ba ka Iingdorbar Thawaiñ ka Jylla ka ladep mynjur ïa ka rai bad ki la ai ruh bun tylli ki dorkhas sha ka Sorkar Pdeng na ka bynta ban mynjur ïa ka ILP ha ka jylla Meghalaya.
“Nga la pynkynmaw sa shisien ïa u Myntri Kam Pohïing, khamtam eh da kaba buh ha ka jingmut ïa ka jinglong jingman kaba mynta ha khappud bad ka ri Bangladesh bad ki jait jingjia bapher bapher kiba jia ha ka ri ba marjan, ka jingrung beaiñ bad ka jingrungtuh ha ka jylla Meghalaya bad haba kheiñ ïa ki jinglong jingman kiba mynta bad ki aiñ kiba mynta kiba don ha ka ri, tang kawei ka lad kaba ngi don ka long ban leit dawa ïa ka ILP bad halor kata ngi kyntu biang sa shisien ïa u Myntri Kam Pohïing ban pyrkhat sani halor ïa kata.”
U Sangma u la pynkynmaw biang ïa ka jingkyrpad kaba la slem bha jong ka jylla Meghalaya ban ai jingithuh ïa ka ktien Khasi bad Garo bad ong, “nga la pynkynmaw sa shisien ïa u Myntri Kam Pohïing ba ngi la mynjur ïa ka rai ha kaba ïadei bad kane ha ka Assembly bad bun sien ngi la aiti ïa ki dorkhas ha u da kaba kyntu ïa u ban pyrkhat khia na ka bynta ban pynrung ïa ka ktien Khasi bad ka ktien Garo ha ka Khyrnit Baphra.”
Halor ka jingtyrwa ban pynïakhlad ïa ka Cadre bad ka jylla Assam, u Sangma u la ong, “Kumba phi la tip mynta ngi don ïa ka Meghalaya-Assam Cadre bad ym don kiwei pat ki jylla ha ka ri kiba ïoh ïa ka rukom pynïasoh lang bad kumta nga la kyrpad bad kyntu ïa u Myntri Kam Pohïing lada ki kynhun jong ka Assam bad ka Meghalaya ruh ki lah ban ïoh ïa la ki jong ki Ophisarkan long ka jingmyntoi kaba khraw ïa ka jylla Meghalaya.
Shuh shuh, u Sangma u la kyrpad ban jer kyrteng ïa kawei ka surok ha New Delhi ha ka kyrteng jong u PA Sangma uba la khlad noh da kaba kdew ïa ki jingnoh synniang jong u sha ka thaiñ Shatei Lammihngi, ki riewlum, bad ki rit paid.
