Shillong, Naiwieng, 24: U Myntri Khynnah ba dei khmih ïa ka tnat Micro, Small and Medium Enterprises, u Bhanu Pratap Singh Verma u la ïashim bynta ha ka Viksit Bharat Sankalp Yatra kaba la long ha ka shnong Tynring kaba hap hapoh ka Mawryngkneng Block jong ka East Khasi Hills District, Meghalaya mynta ka sngi.
Ha ka jingai jingkren jong u, u Myntri u la ong ba ka Viksit Bharat Sankalp Yatra, ka dei ka campaign ha kylleng ka ri ban ai jingtip khnang ban pyntreikam pura ïa ki skhim ka Sorkar India ha baroh ki jaka rilum, ki jaka nongkyndong bad ki jaka sor. U la kren shaphag ka thong jong ka Yatra kaba long ban ai jingtip ïa ki bynta ka imlang sahlang kiba shem jingeh kiba dei ban ïoh bynta ha ki skhim bapher bapher hynrei ki bym pat ïoh jingmyntoi na kine ki skhim.
Ka Sorkar Pdeng ka la shim shibun ki sienjam na ka bynta ka roi ka par jong ki riewlum bad ka imlang sahlang ha ki jaka nongkyndong ha kine ki khyndai snem ba la dep bad ka la wanrah ïa ka roi ka par sha kine ki jaka. U Myntri Rangbah Duh, u Narendra Modi u niewkor bha ïa ka roi ka par kaba pura ha ka thain shatei lammihngi jong ka ri bad u la pynthikna ba ki briew na kane ka thain ki ïoh kham bun ki jingmyntoi na baroh ki skhim Sorkar. Ki jylla ka thain ki la ïoh mad ïa ka roi ka par kaba stet ha kine ki khyndai snem ba la dep haba ka Sorkar ka la peit bniah ïa ka jingkyntiew ïa ki lad ka leit ka wan bad ki jingdon jingem. Ka jingstet ka roi ka par ha kane ka thain ka pyni ba ka Sorkar Pdeng ka peit bha ïa ka jingkyntiew ïa ki lad ka leit ka wan ha kane ka thain bad ka jingtei ïa ki surok bah ha ki jaka ba jynjar ban poi ruh. Na ka Look East Policy kaba rim, mynta la pyntreikam ïa ka Act East Policy.
U Myntri u la sam certificate ïa khyndai ngut ki briew kiba ïoh jingmyntoi na ka Pradhan Mantri Awas Yojana Gramin. Ha ka jingkren shaphang kane ka skhim, u Myntri u la ong ba ka jingpyntreikam ïa ka PMAY-G – ka skhim pynïoh iing ïa baroh – ka la pynurlong ïa ki jingangnud jong kiba duk ba suk ba kin don ka iing lajong. U Myntri u la kren shaphang ki jingkylla kiba la wan lyngba ki skhim jong ka Sorkar kum ka Pradhan Mantri Jan Arogya Yojana, PM Garib Kalyan Anna Yojana, Deendayal Antyodaya Yojana, PM Awas Yojana (Rural), PM Ujjwala Yojana, PM Kisan Saman abad ka Kisan Credit Card.
Ha ka jingkren shaphang ka Tnat Micro, Small & Medium Enterprises, u Myntri u la ong ba kane ka Tnat ka trei borbah ban pynkupbor ïa ki MSME khnang ba kin kiew shaphrang ha ka rukom kaba ïaineh bad khnang ba kin ïahap bad ki jinglong jingman ha kylleng ka pyrthei. Ki longkmie na kane ka thain ki lah ban ïoh ki jingmyntoi na ki skhim jong kane ka tnat namar ka don ka subsidy kaba 33% na ka bynta ki briew na kane ka thain, la ong u Myntri.
Ha ka jingkren shaphang ka skhim ba thymmai ba la plié paidbah da u Myntri Rangbah Duh ha ka 17 tarik u Nailur, ka Pradhan Mantri Vishwakarma Yojana (PMVY), u Myntri u la ong ba ka thong jong ka Sorkar ka dei ban kyntiew ïa ka jingim jong ki nongsaindur bad ki nongshna tiar bad ai ïa ki ka teknoloji ka ban pynkhlain shuh shuh ïa ki ba kin lah ban don bynta ha ki iew ha kane ka juk mynta. Kane ka skhim, kaba peit ïa 18 tylli ki jait kam tynrai, kan pynkup bor ruh ïa ki nongsaindur lyngba ka jingtip shaphang ki tiar katkum ka juk mynta, ka jingpynïaid iew, ka jingsngewthuh shaphang ki kam digital bad ki kam pisa bad ruh ka jingkyrshan jong ka jingïoh shim ram, kiba kyntiew ïa ka jinglah pynmih tiar jong ki bad kaba plié lad ban pynïaid iew ïa ki mar jong ki ha ka rukom kaba kham seisoh bad kaba kham ryntih, la ong u Myntri.
Hapoh ka jingïalam jong u Myntri Rangbah Duh, ka India ka la kiew shaphrang ha baroh ki kam bad mynta ka don ha ka kyrdan kaba 5 ha ka ïoh ka kot ha kane ka pyrthei, la ong u Verma da kaba bynrap ba shen ka ri kan sa kylla sha ka ri kaba don ha ka kyrdan kaba lai ha ka ïoh ka kot.
U Myntri u la ong ba la sdang ïa ka Viksit Bharat Sankalp Yatra da kaba shim ïa ka rukom treikam kaba pura ha ka jingïadon bynta ki tnat Sorkar India bad ki Sorkar Jylla ban pynthikna ïa ka jingïashim bynta jong baroh na ka bynta ka bha ka miat jong ki briew jong ka ri bad khnang ban pynurlong ïa ka thong jong ka jingïoh ïa ka ri kaba la kiew shaphrang. U la kyntu ïa ki nongmihkhmat, ki ophisar bad kiwei kiwei ba kin ïashim bynta ha ka Viksit Bharat Sankalp Yatra ban ai jingtip ïa ki briew bad ban pynshlur ïa ki ba kin leit shim ïa ki jingmyntoi ba ki dei ban ïoh.
U Myntri ka tnat Animal Husbandry and Veterinary jong ka Sorkar Meghalaya, u Alexander Laloo Hek u la ong ba ka Sorkar Pdeng ka la wanrah shibun ki sienjam ba thymmai na ka bynta ka roi ka par jong ka Jylla bad ka ri baroh kawei. U la kyntu ïa ki briew ba kin shim ïa ki jingmyntoi na ki prokram bad ki skhim jong ka Sorkar. Ka Sorkar hapoh ka jingïalam jong u Myntri Rangbah Duh, u Narendra Modi ka dang ïaleh katba lah ban pynthikna ba ym don kano kano ka thain jong ka ri kaba sahdien, la ong u Hek.
Ha shuwa kane baroh, u Myntri u la leit jngoh ïa ki stall ba la pynkhreh ha kane ka jaka. La don ruh ki prokram ‘Jan Bhagidari’ bapher bapher kum ka jingïathuh ki briew shaphang ki jingshem jong ki shaphang ki skhim Sorkar Pdeng, ka jingpyntreikam pura ïa ki skhim kum ka Ayushman Bharat, Jal Jeevan Mission, Jan Dhan Yojana, PM Kisan Samman Nidhi Yojana, ODF Plus status, ki quiz competition, ka jingpyni ïa ka jingpynher drone, ki health camp bad kiwei kiwei. Kane ka prokram mynta ka sngi ka la khring bha ïa ki briew bad la pynlong ruh ïa ka jingbam smai ‘Sankalp Pledge”. Ki heh ophisar jong ka sorkar jylla ki la ïashim bynta ha kane ka prokram.
