Shillong, Rymphang, 27: Ka Ingbishar Meghalaya High Court ha ka sngi Palei ka la pynskhem ïa ka rai jong u Lamphang ka Iingdorbar Thawaiñ u Thomas A. Sangma ban ym ailad ïa ka Special Motion ba la wanrah da u MLA jong ka VPP na North Shillong u Bah Adelbert Nongrum ha ka 15 tarik Rymphang, 2024 ha kaba ïadei bad ka kaiphod CAG halor ka skhim Saubhagya.
Ha ka jingpynbna ïa ka rai, ka Bench kaba kynthup ïa u Chief Justice IP Mukerji bad u Justice W. Diengdoh ki la ong, “…ym don kano kano ka kam kaba long pyrshah ïa ka riti synshar ne kaba be-aiñ ha ka jingtreikam jong u Lamphang ïa kaba yn hap ban tuklar da ka Ïingbishar.”
Ka la kdew ba ha kane ka khep, ka Motion ka long kaba dang kloi por namarba ïa ka kaiphod Audit hapoh ka Rules of Procedures and Conduct of Bussiness jong ka Iingdorbar Thawaiñ ka jylla la hap ban buh shwa hakhmat ka Committee of Public Accounts na ka bynta ban eksamin ïa ka hapoh ka Rule 241 jong ka Rules of Procedures and Conduct of Bussiness ka Ingdorbar Thawaiñ.
“La aibor ïa ka ban leh kumta hapoh ka Article 151(2) jong ka Riti Synshar kaba ong ba ïa ka kaiphod jong u Comptroller and Auditor-General of India kaba ïadei bad ki jingkheiñ jingdiah jong ka Jylla dei ban phah sha u Lat u ban bthah ba dei ban leit buh hakhmat ka Iingdorbar Thawaiñ jong ka Jylla. Dei ban pule ryngkat bad ka Article 208 jong ka Riti Synshar kaba ai bor ha ka ïingdorbar Thawaiñ ban thaw ïa ki kyndon ban pynbeit ïa ka rukom treikam bad jingpynïaid ïa ka kam jong ka,” la bynrap ka ïingbishar.
Katkum kane ka hukum, ka Article 212 ka wan ha ka lynti jong ka Kashari kaba bishar ïa ka jingbha jong ka rukom treikam kaba la bud ryntih.
“Wei ba la bishar bniah ïa ka kaiphod da ka Public Accounts Committee, kan hap ban ai ïa ka daw kaba thymmai ban leh ïa u nongmudui ban wanrah ïa ka jingtyrwa kaba thymmai, lada la ai jingmut ïa u ban leh kumta. Da ki jingpeit bniah haneng, ngi pynskhem ïa ka rai bad ban pynkut noh ïa ka jingkyrpad,” la ong shuh shuh ka hukum.
Ka special motion ka dei ka bynta jong ka kaphod CAG halor ka Social and Economic Sectors kaba kut snem ha ka 31 tarik, Lber, 2022.
Kam shym la mynjur ïa ka jingpynlut kaba kot T. 156.14 klur leh da ka kompeni sorkar, ka Meghalaya Power Distribution Corporation Limited (MePDCL) ha kaba ai kontrak hapoh ka skhim Saubhagya. Ïa kane ka skhim la pynmih da ka Sorkar Pdeng bad la pyntreikam da ka Sorkar Jylla lyngba ka Agency, ka Saubhagya.
Ïa ka pisa la bei da ka Sorkar Pdeng. Ka Sorkar Jylla, ka pyntreikam ïa ka skhim lyngba ka MePDCL.
Da ka shithi kaba lyngkot kaba la thoh ha ka 19 tarik, Rymphang, 2024, u Commissioner and Secretary jong ka Ïingdorbar Thawaiñ u la pyntip sha u nongmudui ba ïa ka Special Motion yn ym shah da u Lamphang namarba ka dang don hapdeng ka jingbishar bniah da ka Public Accounts Committee.
Ka Bench ka la ong ba kane ka dei na ka daw ba ïa ka Ingdorbar Thawaiñ, kaba pynïakhlad ïa ki iktiar, la aibor laitluid ban pynlong ïa la jong ka jingpynïaid kam.
“Lada ki jingbishar ki long kiba pyrshah ïa ka Riti Synshar ne kiba be-aiñ ne kiba palat ïa u pud treikam jong ka ïingdorbar Thawaiñ, namar kata, ka ïingdorbar Thawaiñ kam hap shuh hapoh ka jingïada jong ka Article 212 bad ka Ïingbishar ka lah ban pyndonkam ïa ka bor treikam jong ka, ka don ka bor ban rai ba ka jingbishar kam long kaba donkam bad kumjuh ruh ban pyntreikam ïa baroh ki rukom treikam ba ka la bud.”
“Mynta, lada ka mukotduma hangne ka dei kaba biang ïa kaba ym shym la wanrah da u Lamphang, ha kata ka rukom u Lamphang u leh pyrshah ïa ka Riti Synshar bad u pynduh ïa ka bor bishar bad ka bor ba la pynkhamti ha u. Ka Iingbishar kan don ka bor ban pynbna ba katei ka kam ka long kaba pyrshah ïa ka Riti Synshar bad kan bthah ïa u ban wanrah ïa ka Motion hakhmat ka Iingdorbar,” la ong shuh shuh ka hukum.
