Shillong, Nailar, 04: San ngut ki mynsiem briew ki la duhei ia la ka jong ka jingim hadien ba ka kali kaba ki shong ka la hap ha riat Rngaiñ ha ka miet Sngi U Blei ha ka jaka ba ju khot kum ka Lumngaiñ.
Kine ki san ngut ki kynthup ia ka kmie ka Kong Ellida Marbaniang, 65 snem ka rta kaba dang pun khun, arngut ki khun shynrang, kata, u Mebanador Marbaniang 28 snem ka rta bad u Aimeki Marbaniang 23 snem ka rta na ka shnong Lyngkyrdem Laitlyting, nangta ka pyrsa kurim kaba dei ka tnga jong u Mebanador ka Kong Risbun Kurbah, 22 snem ka rta bad u khun jong u Mebanador uba heprit Damebanshngain Kurbah uba dang shisnem shiteng kiba dei na Mawpun Rum, East Khasi Hills District.
Tang hadien kumba 4 kynta eiei kata haduh ka por 2.30 baje noh sngi jong ka Lah Sngi u Blei, ka kynhun Search and Rescue Team (SRT) ka la lah ban iohsei ar tylli ki metiap na ka riat Rngaiñ kaba jylliew kumba 100mitar eiei bad ha ka por kumba 3:30-3:45 baje janmiet lah ban ioh sei sa ia ki lai tylli ki metiap kata ia ka met jong u Mebanador Marbaniang, u Aimeki Marbaniang bad u heprit Damebanshngain Kurbah.
Ki bahaiing jong ka Kong Risbun Kurbah ki la pyntikna ba ia ka met jong ka Kong Risbun Kurbah bad ia ka met jong u khun jong ka u heprit Damebanshngain Kurbah yn sa pynkit sha Mawpun Rum kaba don ha ki thaiñ Sohiong.
Ia ka met jong ka Kong Ellida Marbaniang bad u Aimeki Marbaniang kumjuh ruh ia u lok jong ka Kong Risbun Kurbah u Bah Mebanador Marbaniang yn sa rah sha shnong kmie jong u sha Lyngkyrdem.
U Bah R.Marbaniang u la pynpaw ka jingsngewsih kthang halor kane ka jingjia hadien ba ka iing ka sem ka la duh noh ia kine ki baieid bathoin jong ki.
U la pynpaw ruh ka jingsngewbynniaw ba ki bor sorkar bad kumjuh ruh ka kompeni kaba pyntrei surok ki leh bym suidñiew da kaba ieh lyngkrang ia kane ka surok kaba la pyndkut noh khlem da kah ne khang lynti. U la ong ba kane ka jingleh jong ki kompeni ka la buh jingma ia ki paidbah hadien habud. Shuh shuh u la ong ba ym tang ha kane ka jaka ba la jia ka jinghap kali, hynrei ki dang bun bun ki bynta ha shi lynter jong ka surok Shillong-Dawki kiba ka kompeni kam shim la shim ia ki lad ki lynti ban ai jingiada ia ki paidbah hynrei la shu ieh lyngkrang kumto bad kane ka buh jingma ia ka iaid ka ieng ki paidbah.
U Rangbah Shnong jong ka shnong Lyngkyrdem, uba la poi sha ka jaka ba jia ka jinghap kali ha riat Rngaiñ u la pynpaw ia ka jingsngewkhia halor kane ka jingjia da kaba kynnoh ba ka dei hi na ka daw ka jingbym shimkhia jong ka kompeni ban ker lane ban iada ha ki jaka kiba don jingma. U la ong ba ka la don ka jingiakren la bunsien ba dei ban ai jingiada ia ki paidbah khnang ba kan ym jia kano kano kaba sngewsiih hynrei mynta ka kynti u la ong ba kane kan dei ka sien kaba khatduh ban iakren bad nangne shakhmat lada ka dang iai jia, ka bor shnong kan hap iaid noh da kumwei pat.
U la ong ba nangne shakhmat ka shnong ka khmih lynti ba ka kompeni ka dei ban peit bha ban ai jingiada ia ki paidbah namarba kane ka surok ka long kaba dum bad teng teng haba iaid lynti hap ban ieng shuwa ruh bym ïohi shuh na ka jingrbeng palat u lyoh.
U Block Development Officer (BDO) ka Pynursla C&RD Block u Bah Lamriche Kharmon tang shu ioh jingtip halor kane u la hiar mar mar ban leit jurip ia kane ka jingjia.
