Shillong, Nailar, 07: Lai ngut ki briew ki la duhei ia la ka jong ka jingim hadien ba kawei ka trok ka bym pat lah satia ban ioh ia u registration number ka la thung khongpong sha kawei ka riat kaba jylliew haduh 300 mitar eiei ynda poi ha Lad Mawkhap, kaba hap hapoh ka Pynursla Civil Division, East Khasi Hills District. Katkum ka jingtip ba la ioh lum la iathuh ba kane ka la jia ha ka 7 tarik u Nailar, 2023 ha ka por kumba 12 baje mynmiet katba ki san ngut ki briew kiba shong ha kane ka trok ki la mih na Pynursla ban leit sha Laitlyngkot ban phah shna ia kane ka kali kaba la don jingthud ha ka Gear Box. Hynrei da ka jingsniew bok, ynda la poi ha Lad Mawkhap, kane ka kali ka la tyllun shadien bad hap syndon jrain sha riat.
U samla Bansiew Khongkliam uba la lait im ha ka jinghap jong kane ka trok uba sah ha ka shnong Phlangshlain bad uba dang don mynta hapdeng ka jingshah sumar ha Shillong Civil Hospital u la shu par dohiap na trai ka riat hapdeng ka jingmynsaw tad haduh ba un da poi sha surok.
Saw ngut kiwei pat kiba shong lang hapoh ka trok ki dei kiba la tip kyrteng kum u samla Yomiki kharshandi, uba la 20 snem ka rta uba dei u nongniah jong ka trok bad uba sah ha ka shnong Lyngiong, u Bah Kyndaiborlang Kurbah, na ka shnong Kseh Mawnai, u Bah Banpeitlang Marbaniang, na ka shnong Nongshken Mawdang bad u Bah Welbokstar Sohlang na ka shnong Kseh Mawnai.
Ka kynhun Search and Rescue Team (SRT) jong ka tnat Fire and Emergency Service, (F&ES) Shillong tang shu ioh jingtip halor kane ka jingjia ki la leit mar mar ban leit ai jingiarap ia kine ki lanot. Kat haduh mynta, kane ka kynhun ka dang ioh sei tang ia ka met jong ki lai ngut kiba la khladnoh katba uwei pat u dang jah rngai haduh mynta.
