Shillong, Naiwieng, 21: Kumba ju long manla u snem ban bha ka kamai kajih ha Iewduh bad ruh ban bha ka synshar ka khadar, ka Raid Mylliem ha ka sngi baar ka la pynlong ia ka lehniam Iewduh ha khlieh iewduh da kaba la sdang ia ka duwai ka phirat ha u nongbuh nongthaw ban bha ka kamai ka kajih jong ki nongshong iew ha Iewduh kaba dei kawei na ki kad khaii kaba heh tam hapoh kane ka jylla, ia kaba la ju tip ruh kum ka pliang ja ka Ri Khasi.
Hadien ba la pyndep ia ka duwai phirat, la ot shwa ia u syiar ryngkuh ban lehniam bad la pynbud pat sa da kaba pom ia ki ar tylli ki blang shynrang ban bit ban biang ki khun ki hajar jong ka Raid bad kumjuh ruh jong ka Hima Mylliem hi baroh kawei .
Ha kane ka lehniam la pom lai tylli ki blang, ar tylli ki syiar bad uwei u sniang da ka jingsakhi lang jong u Syiem ka Hima Mylliem u Paiem Ainam Manik Syiem ryngkat ki Myntri bad ki Bakhraw jong Hima.
Hadien ba ladep ka lehniam na khlieh iewduh jong ka Raid Mylliem la pynbud pat sa ka jingpom ia ka blang kynthei bad ka kñia ka khriam ha Basa Tympew da ka jingsakhi lang ki khun ki hajar jong ka Raid Mylliem.
Ia kane ka lehniam jong ka raid Mylliem la pyniaid da u Lyngdoh jong ka Raid ryngkat bad u Lyngskor lyngba u Myntri Sohtun jong ka Hima Mylliem lem bad u Kharkongor uba shim ia ka bynta ban ot ia ki syiar bad ia ki blang.
