Shillong, Nailar, 28: Ki Pulit ka Saitsama Police Out Post kiba hiar sha ka shnong Lapangap, kaba don ha khappud bad ka Jylla Assam ban pynlong ia ka jingtohkit hadien ba la ioh jingtip ba ki Pulit ka Jylla Assam ki la thaw ktem ha u pud u sam jong ka shnong Lapangap ki la hap ban randien noh namar ka jingshah kthong ha ki paid Karbi ha ka sngi Saitjaiñ jong ka taiew baladep.
U Superintendent of Police ka West Jaiñtia Hills u Bah C. Syrti haba pynshai halor ka jingmih ki khubor ha ka rynsan social media, u la ong, “ha ka sngi Saitjaiñ ka kynhun Pulit jong ngi ka la leit tohkit hadien ba la ioh jingtip ba ki Pulit Assam ki la shna ktem ha kane ka jaka kaba ki paid Karbi ki la kam ba ka dei kaba hap hapoh ka Jylla Assam katba ki nongshong shnong ka Lapangap ki la kam ba ka dei kaba dang hap hapoh u pud u sam jong ka Jylla Meghalaya.”
U SP u la iathuh ruh ba ki paidbah na ka liang jong ka Jylla Assam ki la mih paidbah bad dawa ia ki Pulit Meghalaya ba ki dei ban phaidien sha ka jaka ba ki wan namarba kane ka jaka ka dei kaba dang hap hapoh ka Jylla Assam.
“Ki paidbah ki la sdang khih bitar bad kawang da ki maw bad siat ruh da ki jri siat sim ban pynher krad ia ki Pulit. Namarba kam don satia kano kano ka dak kaba pyni kano ka liang kaba dang hap sha ka Jylla Assam bad kano kaba hap sha ka Jylla Meghalaya, ka kynhun Pulit ki hap ban randien sha ka jaka ba ki wan bad kim shym la pynibor khnang ban kiar na kino kino ki jingjia ba sngewsih,” la iathuh u SP.
“Ki paidbah na ka liang jong ka Assam ki la ieng beit hajuh khlem da khih da kaba kam ba ki don sha ka liang jong ka Jylla Assam bad sangeh noh ban beh ia ka kynhun Pulit jong ngi. Hadien ba la pyntip sha ki Pulit Assam, mar mar ki la wan poi sha kane ka jaka bad hadien kata la lah ban tem ia ki paidbah. Ha kajuh ka por, ki Pulit ki la tem ruh ia ki paidbah na Meghalaya ba kim dei satia ban tur sha ka jaka ba don ka jingiakajia,” la iathuh u SP.
