Shillong, Naiwieng, 10: U Pro-Vice Chancellor ka skulbah NEHU u la hap ban pynmih ïa ka jingpynbna ha ka Lah Sngi u Blei ba la hap ban pynsangeh noh ïa ka Executive Council kaba 193 jong ka skulbah NEHU kaba la pynbeit ban pynlong ha New Delhi ban pynïaid da u Vice Chancellor u Professor P.S Shukla.
Kane ka jingpynsangeh noh ïa ka jingïalang ka long halor ka jingpyrshah jong ki samla pule ka skulbah NEHU kiba la mih ban pynpaw ïa ka jingpyrshah da kaba pynlong ïa ka jingïaid rally ha phyllaw jong ka skulbah NEHU.
Ka North Eastern Hill University Students Union (NEHUSU) bad ka Khasi Students Union (KSU) NEHU Unit ki la phah da ka jingthoh sha u Myntri ka Sorkar Pdeng uba khmih ïa ka tnat Pule Puthi u Dharmendha Pradhan ban pynpaw ïa ka jingpyrshah halor ka jingthmu ban pynlong ïa ka jingïalang jong ka Executive Council shabar u pud u sam jong ka skulbah NEHU.
Ki la kren shai ba kim don eiei ban pyrshah ïa ka jingïalang jong ka Executive Council hynrei ka jingpyrshah ka long ba ïa ka jingïalang yn pynïaid hi u Professor Shukla bad nalor kata la pynbeit ruh ban pynlong ruh shabar jong ka skulbah NEHU namarba kine ki ar tylli ki mat ki long da khongpong ïa ki kular jong ka Sorkar Pdeng ïa ki samla pule ïa kaba la sakhi lang da ki nonghikai kiba don hapoh ka shatri jong ka NEHUTA.
Ki la pynkynmaw ruh ba ïa u Prof. Shukla la pynbna kum u Persona Non Grata lane u briew u bym pdiang shuh da ka Mawlai Town Dorbar, ka NEHUSU, ka NEHUTA, ka NEHUNSA bad kiwei pat ki kynhun bad kumta kano kano ka rai ba la shim ha ka jingïalang ba pynïaid da u Prof. Shukla ka long kaba be-aiñ bad ym dei ban ithuh namarba u dei u briew uba la duh jingshaniah.
Hadien ba ki samla pule ki la pynlong ïa ka jingïakhih hakhmat ka Administrative Block, u Pro. VC Prof. S. Umdor u la wan pynshai ïa ki samla pule ba ïa ka jingïalang la pynsangeh noh namar ka jingpyrshah.
