Shillong, Naiwieng 24: Ïa ka met ba dang sah jong u Bah Standlington David Khongwir, la tep donburom ha ka sngi Thohdieng hapdeng ka jingleh burom kaba la pynjaw ummat ia kiba la sakhi lang kane ka sngi.
Hadien ka jingleh burom ha ing, ka Mawlai Town Durbar ka la shimti ban leh burom ha Basketball Court jong ka shnong Mawlai Nonglum ia une u MLA uba nyngkong eh jong ka Mawlai Constituency u Bah SD Khongwir.
Ha kane ka jingïalang leh burom ïa u Bah SD Khongwir ki nongïalam shnong, ki riewrangbah bad ki riew paidbah ki la wan ban leh burom khatduh ïa une u nongïalam.
Ha kane ka sngi la ïoh ka jingkren na u MLA ka Mawlai u Bah Brightstarwell Marbaniang, u MDC u Bah Teiborlang Pathaw, u President ka Mawlai Town Durbar bad kiwei kiwei.
Ki nongkren ba pher ba pher ha kane ka sngi ki la niew tang ïa ki katto katne ki kam radbah kiba une u nongïalam ki la ieh shadien bad kiba ïai long ki sakhi ïa ki matti jong u.
Hadien ba la dep ïa ka jingleh burom la rah noh sha lum jingtep jong ka Balang Presbyterian Nonglum ban tep don burom ïa u Bah SD Khongwir.
Na ka liang jong ka UDP hapoh ka jingialam u Working President u Paul Lyngdoh ruh u buh syntiew bad pynpaw ka jngsngewlem.
Na ka liang ka Shnong Mawlai Nonglum u Secretary jong ka Shnong, u la ïathuh ba dei ha ka por ba long MLA bad Deputy Chief Minister i Bah SD Khongwir ba la weng noh ïa ka Pata System lane kata ka aiñ iadie iathied khyndew kaba don hapdeng ki Khasi kaba ki nongthied kim ju ïoh syndon ïa ka jaka, hynrei ki shu ïoh tang ki nongshongwai bad ki nongpyndonkam ïa ka jaka.
Ka Shnong ka la pynkynmaw ruh ba ka kyntien Rangbah Shnong ruh ka dei ka jingai jingmut jong i, ha ka por ba i shimti kum u Rangbah Shnong, ha kaba mynshuwa ïa u Rangbah Shnong la ju ong kum u Tymmen Shnong bad ïa kane ka jingai jingmut jong i la pdiang bad pyndonkam ruh ha baroh kawei ka Ri Khasi Jaiñtia da ka kyntien Rangbah Shnong. I la ïathuh ba u Bah Khongwir, udei ruh u nongïalehkai Sports uba tbit khamtam ha Shot Put ha kaba u bat ïa ka record jong ka Mawlai haduh mynta. U long ruh u nongïalehkai Phutbol kum u nongap kol uba tbit.
La ïoh ruh ïa ka jingkren na iwei na ki Ksiew kynthei jong i, iba la ïathuh ba u Paieit jong i, u long u briew uba ieit ïa ki jingrwai bad u ju pyllut por bad ki ksiew ban sngap jingrwai.
La ïoh ruh artylli ki jingrwai na ki Ksiew kiba dei ki jingrwai ba i Bah Standling i ju sngewtynnad ban sngap.
