Shillong, Shillong, 05: Wat hadien ka jingshah kem jong ki nongïalam ka Meghalaya Commercial Truck Owners and Driver’s Association (MCTO&DA) ba kynthup ïa u Bah Mosklander Marngar bad u Bah Heibor Pariat hynrei ki dkhot ka seng ki dang ïai bteng beit ban pynlong ïa ka jingïakhih ha ka shnong Mawryngkneng.
Ki dkhot ka seng ki la dawa ruh ïa ka Sorkar ba ka dei ban pyllait mardor ïa ki dkhot bad ïa ki nongïalam na phatok khlem da teh kyndon.
U nongaiktien jong ka All Khasi Meghalaya Tourist Taxi Association (AKMTTA) u Bah Balajied Jyrwa ha ka jingïakren bad ki lad pathai khubor ha ka jingleit jngoh ïa ki dkhot jong ka MCTO&DA ha Mawrynkeng ha ka sngi Balang, u la kynnoh da kaba ong, “dei ka jingshim pisa jong ki MLA kiba shong ha Secretariat bad ki MDC ka Jaiñtia Hills Autonomous District Council (JHADC) kaba pynlong ïa ki ban ai jingïada ïa ki karkhana pynmih dewbilat na rilum Jaiñtia bad lada kam long kumta kumno ka Sorkar kan shu phah kem ïa ki nongïalam ka Meghalaya Commercial Truck Owners and Driver’s Association (MCTO&DA).
U Bah Jyrwa u la kynthoh shuh shuh, “ngi ïohi mar syn byrngem na kompeni ba ki bor synshar district ki kloi (ban kem) bad mar syn ong u Devendar ka pyni shai ba ki MLA bad ki MDC kiba synshar mynta kiba shong ha JHADC bad ha Secetariat ki ladep bam pisa na kine ki kompeni na kata ka daw ki ïada ki sumar ïa kine ki kompeni. Lada kam dei kumta balei la phah kem ïa ki nongïalam jong ka MCTO&DA).”
“Balei shi syn byrngem uta (Devendar) ba ki shim (kam) wut wut. Phi la ïohi ïa ka jingïakhih naduh nyngkong ki sngi ba ka long kaba jai jai da ka ka jingpynsngewthuh na ka bynta jong phi bad na ka bynta jong ngi bad na ka bynta ka lawei ban wan,” u la bynrap.
“Mar syn byrngem ki kompeni ki bor synshar district ki kloi ban kem wat ïa ki dkhot. Ka jingwan mynmiet ka long thik kumba wan kem ïa ki lehnoh,” u la kynnoh.
Ha ka jingïakren bad uwei u trai trok, u la ong, “ka jingïakhih jong ngi ka long ban dawa ïa ki trai karkhana hynrei balei pat ka sorkar ka wan tuklar bad hynnin mynmiet ki wan kem ïa ki nongïalam bad ki shoh ki dat ïa ki dkhot jong ngi haduh ba kin da mynsaw.
“Ngi sngew ba kane ka sorkar ka la shu ban beiñ namarba ngim shym la ïakhih pyrshah ïa ka Sorkar hynrei ngi la dawa ïa ka dor ba la buh da ka sorkar T.9 katba ka Sorkar kam kwah ba ïakren ïa kata ka dor hynrei la shu thombor ïa ki dkhot bad ki la kem ruh ïa ki dkhot bad ïa ki nongïalam jong ngi,” ula ong.
“Ngi dawa ban pyllait mardor ïa u President bad ki dkhot jong ngi hapoh 24 kynta khlem jingteh kyndon,” u la ong bad bynrap, “katba ka Sorkar kam pat lah ban pyllait ïa ki nongïalam jong ngi, ngin ym pat pynsangeh ïa ka jingïakhih.”
“U Devendar Singh uba dei u Manager jong ka Star Cement bad Treasurer jong ki karkhana kiba don hapoh East Jaiñtia Hills uba la kren bein ïa ki paid Khasi jong ngi bad ha kato ka sngi ba ngi leit ïakren ha ophis u DC ha East Jaiñtia Hills, ma u, u la byrngem byrsit ha kato ka por ba ngin phah kem ïa ki nongïalam lada mem weng ïa ka jingïakhih. Kata ka la long shisha kumba ma u, u la byrngem. Haduh katne ka jingdonbor jong u (Devendar) ban phah kem ïa ki trai ri trai muluk jong ngi. Nangne shakhmat shano shuh ngin ïakhih. Hynnin mynmiet ki la kem ïa u President bad ïa ki dkhot jong ngi, sa katno ngut phin dang kem. Ko Sorkar phi la shah pynbam haduh katno, haba tang shikyntien ka jingbyrngem jong u ha ophis DC, East Jaiñtia Hills mynta ka la urlong,” u la ïathuh.
U la ong ba ka sorkar ka dei ban siew ïa ka bai sumar ïa ki dkhot kiba la mynsaw na ka jingshah kawut lathi.
U Sordar ka shnong Mawryngkneng u Bah Peter J. Lawai u la ïathuh ba ka Dorbar Shnong hi kaba la ai jingbit ïa ka MCTO&DA ban pynlong ïa ka jingïakhih kaba jaijai namarba ka sngewthuh ba kiba bun na ki nongshong shnong ha Mawryngkneng ki dei ki trai trok bad ki nongniah trok naduh ki por ba mynshwa haduh mynta ki im ja na ka kam kamai kali.
