Shillong, Jymmang, 31: Ka jingwan ka erïong bad ka jingther jong u lapbah lapsan ha kylleng ki district jong ka jylla Meghalaya ka la dkhat jubor ïa ka jingim jong ki 6 ngut ki nongshong shnong ha kine ki lai sngi ba la la leit noh, kynthup ruh ha ka sngi Saitjaiñ.
Ha ka sngi Saitjaiñ, ha East Khasi Hills u heprit Mebanskhem Mukhim, 14 snem na ka shnong Kharang, Mawkynrew C&RD Block u la duhei ïa ka jingim ka jingkhyllem jong u diengbah ba la jynrat da ka eiong.
Ha West Garo Hills la pyntip ba ki don arngut kiba la duhei ïa ka jingim na ka jingshah pom ha ka leilieh ha Kentapara, Dadenggre C&RD Block. Kine ki arngut ki long ka heprit Batgrikchi A. Sangma, 7 snem ka rta bad ka heprit Brime D. Sangma,13 snem ka rta.
Ha ka shnong Kyrdeng, Bhoirymbong C&RD Block, Ribhoi District u Bah Nicolas Kharpran, 36 snem u la duhei ïa ka jingim ha ka sngi Thohdieng hadien ba u la ngam jyllop ha Wah Umlew kaba don ha ka shnong Mawkduk.
Katkum ka jingai jingkheiñ ha ka sngi Thohdieng, kiba ïap ha East Khasi Hills District ki long ka kong Klosliya Kharkongor, 45 snem kaba sah ha ka shnong Lumkyntung kaba hap hapoh Laitkroh–Khatarshnong Block. Une u rangbah u la khladnoh na ka jingtwa ka khyndew, katba uwei pat uba khladnoh u dei uba la tip kyrteng kum u Samborlang Tariang, 35snem na ka shnong Mawbynna, Pomlakrai uba la ngam jyllop.
Haduh 1094 ngut ki briew ki la shah ktah na ka jingwan lynshop jong ki bor ka mariang ha kine ki lai sngi kata haduh ka 29 tarik haduh ka 31 tarik, Jymmang, 2025.
Katkum ka jingai jingkheiñ da ka Meghalaya State Disaster Management Authority (MSDMA), haduh 49 tylli ki shnong ki la shah ktah ha ki 29 tylli ki Block, 28 tylli ki iing ki la shah pynjulor, 4 ngut ki briew ki la mynsaw bad 33 tylli ki jingtei ki la la shah pynjulor ha ka jingshlei um, ka jingsyllad jong ka eriong bad ka jingther jong u lapbah lapsan.
La ïoh jingtip ba ka la don ka jingtwa khyndew ha Nongstoin bad Umling, West Khasi Hills, ha Bhoirymbong, Umsning Ri Bhoi, ha Ranikor bad Mawkyrwat, South West Khasi Hills, ha Mairang bad Mawthadraishan, Eastern West Khasi Hills.
Ka MSDMA ka la pyntip ruh ba ka la don ka jingshlei um ha Kalatek, Shella, East Khasi Hills ha kaba ar tylli ki iing ki la shah rong ha ka umsaw. Ka eriong kaba jur ka la jynrat ruh ïa ki dieng, pynjulor ïa ki ing kynthup ïa kawei ha Maheshkola, Ranikor Block bad bun jaka ki sainai elektrik ki la dkut.
Ka jingai jingïarap haduh mynta ka dang ïai bteng ban sam marbam sha ki longing ba la shah ktah kynthup ïa ki 10 tylli ki longiing ba la shah ktah na ka jingshlei um bad na ka jingtwa khyndew ha Sumer Latara, Ri Bhoi District.
