Shillong, Nailar, 29: Ka Iingbishar Meghalaya High Court ka la bthah ïa ka Shillong Municipal Board (SMB) ban leh ïa ka jingjurip kaba bniah bad ban aiti ïa ka jingjurip ïa baroh ki nongdie madan kiba die jingdie ha Laitumkhrah hapoh lai taiew bad ban pynthikna ba ym shah shuh ïano ïano ruh na ki nongdie madan ban dang die jingdie ha kane ka thaiñ.
Kane ka jingbthah jong ka ïingbishar ka la mih hadien ba ka Municipal ka la ai ïa ka kaiphod kaba pynpaw ba ka jingbun ki nongdie madan ha katei ka thaiñ kim don ïa ki laisen die madan.
Ka kaiphod jong ka Shillong Municipal Board ka la lap ba ki don 122 ngut ki nongdie madan kiba kamai ha ka thaiñ Laitumkhrah khlem laisen. Napdeng kine, 22 ngut ki nongdie jingdie la khein ba ki long kiba “bit ban ïoh katkum ki kyndon jong ka skhim.”
Ka Municipal ka la kdew ruh ba 48 ngut kiwei pat ki nongdie madan ki la kam ba ki dei ki nongdie madan ha surok.
“Ha kita ki jinglong jingman, donkam ban bishar bniah da ka Shillong Municipal Board. Ngi bthah kumne harum: ka Board kan leh ïa ka jingjurip kaba bniah ïa ka thaiñ Laitumkhrah hapoh lai taiew naduh ka tarik bad kan lum jingkhein ïa baroh ki nongdie madan harud surok kiba treikam hangta ryngkat bad ki jingtip ba bniah ha kaba ïadei bad ki kyrteng jong ki,, ki mar ba la die bad ka jaka ba la shong da uwei pa uwei bad ka por ba la shong die jingdie ka dang bteng bad kumta ter ter,” la ong ka Division Bench kaba kynthup ïa u Chief Justice IP Mukerji bad u Justice W Diengdoh ha ka hukum ba la pynmih ha ka sngi Thohdieng hadien ba la bishar ïa ka aplikeshon ba la mudui da ka Seng Samla Laitumkhrah.
“Ka Board ryngkat bad ka jingïarap jong ki bor synshar kynthup ïa ki Pulit kin pynthikna ba haduh ban da pynmih ïa kiwei pat ki hukum, yn ym shah ïa uwei ruh u nongdie madan ban die jingdie ha kata ka jaka. Ban ïada na kum kane ka kam, hap ban don ka jingpeitngor kaba pyrkhing bha. Ka Board kan bishar ïa baroh ki aplikeshon kiba dang sahteng ha khmat jong ka ban ai ïa ka jingpynshisha jong ka jingdie jingdie/die jingdie katkum ka aiñ bad kan bishar bniah ïa ki laisen die jingdie katkum ka aiñ. Kane kan kynthup ïa ki 22 ngut ki nongdie madan kiba ka Board ka shim ba ki long “kiba dei hok ban ïoh katkum ki kyndon jong ka skhim” lada la ai ïa ka jingpan jingbit kaba biang katkum ka aiñ da uwei pa uwei na ki,” la ong ka hukum kaba bthah shuh shuh ba, “ka Board ka lah ruh ban ailad ïa kito ki nongdie kiba “dei hok” hynrei ki bym shym la thep aplikeshon ne ki bym don laisen kin pyntreikam ïa kajuh katkum ka aiñ.”
La bthah ruh ïa ka SMB ryngkat bad ka bor synshar ban wad ïa ka jaka kaba biang ban pynkynriah ïa ki nongdie madan kiba la ïoh laisen.
“Ka bench ka la bthah shuh shuh ïa ka Jylla bad ïa ka SMB ban ai lang ïa ka kaiphod ne la ka jong ka kaiphod shwa ka tarik ba lah ban shong bishar biang ïa ka PIL. Ïa ka PIL yn sa shong bishar biang hadien phra taiew.
