Shillong, Rymphang, 04: Ka Iingbishar Meghalaya High Court ka la kynthoh tyngeh halor ka jingpynslem jong ka Sorkar Jylla ban shna ïa ki projek thang metïap, bad aipor khatduh tang saw taiew ban pyndep.
Ka Iingbishar ka la dawa ruh ba dei ban phah ïa ka kaiphod bad maham ruh ban leh da kaba tyngeh lada ka Sorkar ka dang pynslem ïa kane ka jingaipor.
Ka Iingbishar ka la pynpaw ruh ïa ka jingsngewkhia kaba jur halor ka jingbym leh eiei ka sorkar ban shna ïa ki jaka thang metïap na ka bynta ki briew kiba dang ksoh ha ka niam tynrai jong ki Khasi, Jaiñtia, bad Hindu.
Ka Public Interest Litigation ka la pynpaw ruh ba ka don ka jingïakynad ba ki Khasi bad Jaiñtia ki ar tatien ban ïasam jaka na ka bynta ban thang ïa ki metïap bad ki Hindu.
Watla ka Sorkar ka la tyrwa ban shna noh da ka Electric Hybrid Crematorium ha kiba bun ki bynta kynthup ha New Shillong, Tura, Jowai bad ha Nongpoh, hynrei ym pat shym la mang pisa satia ban pynurlong haduh mynta.
Ka hukum jong ka Iingbishar ba la pynkih ha u bnai Risaw, 2025 ka thmu ban weng ïa ka jingeh da kaba ai jingmut ban ïasam bynta lang ha ki jaka thang metïap da kaba buh noh la ka jong ka por na ka bynta ki jaidbynriew bapher bapher. Hynrei, ka kam ka dang suki haduh katta katta.
Ha ka hukum kaba tyngeh, ka Iingbishar ka la bthah ïa ka District Magistrate ban pyntreikam ïa ka hukum kaba mynshwa hapoh saw taiew. U Amicus Curiae ba dang shu thung thymmai u Bah N. Syngkon un ïatreilang bad ki bor pynïaid District ban weng ïa kane ka jingeh.
La buh sngi ban shong bishar ïa kane ka kam ha ka 8 tarik, Ïaiong, 2025.
