New Delhi, Nailur, 15: U Convenor jong ka seng saiñpyrthei Aam Aadmi Party (AAP) u Arvind Kejriwal ha ka sngi U Blei u la ong ba un sa hiar noh na ka shuki Myntri Rangbah ka Delhi hapoh ar sngi hadien ba ka party ka la jied da uwei pat uba thymmai u ban shimti ïa kane ka shuki.
Haba pynbna ban resaiñ na ka kam Myntri Rangbah ha ka jingai jingkren sha ki nongtrei jong ka party ha ka ophis treikam jong ka AAP, u Kejriwal u la ong ba un sa dawa ruh ba dei ban pynlong noh kham kloi ïa ka elekshon ha Delhi bad u la smai ruh ba un ym shong ha ka shuki Myntri Rangbah tad haduh ba ki paidbah kin da ai ïa u da ka “certificate of honesty”.
“Ka elekshon ha Delhi kan sa long ha u Rymphang, hynrei nga dawa ba dei ban pynlong ïa ka elekshon ha u Naiwieng ryngkat bad ka Maharashtra,” la ong u Kejriwal.
“Da ka jingkyrkhu jong ki paidbah, ngi don ïa ka bor ban ïakhun pyrshah ki jingïasylla ba sniew jong ka BJP. Mynta, ngi la lah ban leh bun kiei kiei na ka bynta ka Delhi namarba ngi khuid,” la ong u Kejriwal.
“Mynta, ki la sheptieng ïa ka jingkhuid jong ngi namarba ïalade kim long kiba khuid. Ngam shym la don bynta ha kane ka ka jinglehkai jong ka ‘bor na ka pisa bad ka pisa na ka bor. Nga la ïoh ïa ka hok na ka ingbishar jong ka aiñ, mynta, ka ingbishar jong ki paidbah kin ai ha nga ïa ka hok. Mynta, ngin sa shong biang ha ka shuki Myntri Rangbah hadien ba la ai rai da ki paidbah nongshong shnong jong ka Delhi,” u la ong.
Da kaba kdew ïa ki shithi ba la thoh da u Bhagat Singh uba la shah set along mynshwa ha ka Sorkar Phareng, u Kejriwal u la ong, “ïa ki nongïaleh laitluid jong ngi la ailad ba kin ïakynduh markhmat ïa ki paralok, hynrei ïa u paralok jong nga na kajuh ka party u Sandeep Pathak ym shym la ailad ban ïakynduh markhmat ïa nga. Nga la thoh tang kawei hi ka shithi sha u Lieutenant Governor na along Tihar.”
U Kejriwal u la ai ka jingkyrmen ïa u Satyendar Jain bad ïa u Amanatullah Khan, kiba dang don mynta hapdeng ka jingshah set along, ki ban sa lait noh shen na along.
