Shillong, Rymphang, 15: Ki shipai BSF kiba ap pahara ha khappud ka Jylla Meghalaya ki la lah ban tehlakam ïa ki kam runar ruser bad ïa ka jingwan rung beaiñ jong ki mynder na ka ri Bangladesh sha pud u sam jong ka ri India.
Tang hapoh kine ki ar taiew ba la leit noh, kata naduh ka 1 tarik haduh ka 15 tarik mynta u bnai ki shipai Border Security Force kiba ap pahara ha khappud ki la ïoh kurup ïa ki jingdih pynbuaid bad ïa ki mar khaii tuh kiba shongdor haduh T.1,01,22,689 klur bad ïohkem ruh haduh san ngut ki nong India bad 23 ngut ki mynder Bangladeshi kiba donkti ha ki kam runar bapher bapher.
Kane ka kynhun shipai ïada khappud ka la kdew ïa ki jingjop ba kongsan jong ka Meghalaya Frontier da kaba pyntip ïa ka jingshimkhia ban pynneh ïa ka jingpeitngor bad ban pynthikna ïa ka jingshngaiñ ha khappud.
Ki jingjop jong kane ka kynhun shipai ka long ruh halor ka jingïoh kurup 185 tylli ki masi bad ka jingïoh kurup ïa kiwei pat ki tiar ba la kheiñ be-aiñ.
Ïa kine ki jingpyrshang la pynskhem da ka jingïatreilang bad ki tnad sorkar bad ki tnad treikam ka Sorkar Pdeng kiba thmu ban pynneh ïa ka jingsuk bad ban khanglad ïa ki kam beaiñ ha ka thaiñ.
Nalor ki kam pahara khappud, ki BSF ki la pyni ruh ïa ka jingkitkhlieh ïa ka bha ka miat jong ki briew kiba sah hajan khappud. La pynlong ruh haduh 8 tylli ki Civic Action Programme, kynthup ka jingai jingsumar ei sha ki paidbah ba sah ha khappud, ka jinghikai pyntbit, ki lympung ïalehkai bad ki jingpyni nam ïa ka kolshor. Kine ki jingthmu ki la don ka bynta kaba khraw ha kaba kyntiew ïa ka jinglong jingman jong ki nongshong shnong bad ban pynroi ïa ka jingshanïah hapdeng ki BSF bad ki paidbah kiba shong basah ha khappud.
Kane ka kynhun shipai ka ju ïashim bynta ruh ha ki jingïalang bad ki shipai ïada khappud na ka ri Bangladesh ban ïakren ïa ki jingeh kiba ïadei bad ka khappud bad ban pynkhlaiñ ïa ka jingïatreilang bad ki shipai pahara khappud jong ka ri Bangladesh. Kine ki jingpyrshang ki thmu ban kyntiew ïa ka jingïatreilang bad ban pynthikna ïa ka bha ka miat jong ki paidbah kiba sah ha ki jaka khappud, da kaba pynkhlaiñ ïa ka jingïadei paralok hapdeng ki ar tylli ki ri.
Ka BSF Meghalaya Frontier kan ïai bteng ban pynthikna ïa ka jingshngaiñ ha khappud, ban pynkhlaiñ ïa ka jingïatreilang bad ban kyrshan ïa ka roi ka par jong ki paidbah kiba shong basah ha khappud.
