Shillong, K’lyngkot, 08: U Symbud Myntri Rangbah ka Jylla uba khmih ïa ka tnat Transports u Bah Sniawbhalang Dhar u la ïathuh ba kan shim por haduh lai snem kynthih ban shna pynheh ïa ka kad liengsuiñ Shillong ha Umroi.
U la pyntip sha ki lad pathai khubor ba ki Deputy Commissioner ki dang trei ïa ka kam na ka bynta ban shim jaka sa khyndiat na ka bynta ban pyntreikam ïa kane ka projek.
“Kumba 22-23 akar ka jaka yn donkam na ka bynta ban shna pynheh ïa ka projek bad ngin pyrshang ban pyndep ïa ka jingpyntreikam ïa kane ka projek hapoh lai snem. Ngin sa ïa peit bad ngi kyrmen ïa kaba bha,” ong u Dhar.
Dang ha u snem ba ladep, ka Iingbishar Meghalaya High Court ka la pynmih ïa ka hukum kaba bthah ïa ka Sorkar Jylla ban aiti noh ïa ka jaka ba la thied sha ka Airport Authority of India (AAI) na ka bynta ban shna pynheh ïa ka kad liengsuin Shillong hapoh lai bnai.
Haba kylli, u Bah Dhar u la ong, “la shu mynjur tang da ka ktien da u Myntri ka Civil Aviation ha ka jingwan jngoh jong u ïa ka jylla bad hadien ba la ïoh ïa ka jaka, ngin sa pynkhreh noh mardor ïa ka jingtyrwa.
“Ha ka jingsngew jong nga shimet, nga kwah noh lashai hi, hynrei ha ka kam pat kam long kumta ka kham shim por. Ka jingshim jaka, ka jingpynkhreh ïa ka DPR, ka jingmang pisa, ka jingaiti ai ka kam bad baroh kine, hapoh lai snem ka dei ban dep bad ngin pyrshang katba lah namarba kan long ka jingmyntoi ïa ki paidbah jong ngi hi,” u la ong bad pyntip ba ka jylla kan sa ïohi ïa ka jingkylla namarba ki liengsuiñ kiba heh kin sa lah ban hiar ha kane ka kad liengsuiñ ha Umroi.
Dang shen u Bah Dhar u la ong ba ïa ka jingshim jaka yn sa pyndep noh hapoh u bnai Lber, mynta u snem.
U la pyntip ba ka Sorkar ka ladep leh ïa ka jingsorjamin bad mynta yn dang ïapynbeit sa bad ki trai khyndew halor ka dor ka mur.
