Shillong, Jymmang 08 : U Myntri Rangbah ka jylla Conrad K Sangma ha ka sngi Palei u la leit ban jurip bun tylli bha ki jingtrei kiba dang ïaid shaid shaid mynta ha New Shillong Township ha ryngkat ka jingdonlang ki heh sorkar na ka Planning bad Urban Affairs Department.
Kawei na kine, dei ka jingpyntrei ïa ka Secretariat ba thymmai ha Umsawli kaba ka kam ka la sdang bad ïaid shaid shaid mynta. Ïa kane ka Secretariat ba thymmai la mang ban tei ha ka jinglut kaba kot sha ka 118 klur tyngka bad la buh ban pyndep ïa ka ha ki pdeng jong u snem 2027.
Lah ban kdew hangne ba ïa u mawnongrim na ka bynta kane ka projek la buh ha ka 21tarik u Kyllalyngkot, 2025.
Haba kren hadien ka jingjurip u Myntri Rangbah u la ong ba kane ka jingtei kaba khraw kan long ruh kum ka nongrim na ka bynta ka synshar khadar kaba treikam ha kaba ka jingpynwandur ïa ka la leh da kaba ïaid ryngkat ryngkat bad ka kolshor katkum ka juk mynta. “Ngi khmih lynti ba shen ngin sa lah ban pyndep noh,” u la ong.
U Myntri Rangbah u la ong ruh ba hadien bala dep kane ka projek kan ym long shuh tang kum ka sor ba don ka jaka treikamkaba heh hynrei kan ïarap ruh wat ban weng ïa ka dheng kali kaba jur ha nongbah Shillong.
U la ïathuh ruh ba kin don bun bha ki surok shnong ha ka New Shillong Township bad bun na kine ki la dep bad donruh kiba ka jingtrei ka dang ïaid. U la ong ruh ba ka surok ha ka administrative township kan pynïasoh ruh bad bun ki jaka ba kongsan ha katei ka thain nalor ba kan wanrah ruhka jingkylla kaba bun ha Shillong.
Hadien kane u Myntri Rangbah u la leit ruh ban jurip ïa ka jingpyntrei ïa ka Unity Mall.
Hadien kane u la leit ban jurip ruh ïa ka surok Ummir sha Mawkhanu kaba dei kawei na ki surok kaba pynïasoh ïa ka Administrative bad Knowledge City ha katei ka thain.
Ha ka por mynstep u Myntri Rangbah u la leit ban jurip ïa ka Polo Mall ne ka iew Polo kaba shan thymmai hapohka Smart City Project. kane ka jingpyntrei kala dep mynta bad ka kam kaba dang ïaid ka long sa tang ban aiwai noh ïa ki dukan ha katei ka Mall. Ha kane ka Mall ki don ruh ki jaka ban pynlong ïa ki tamasa, ka jaka bam bad ruh ka jaka die jingdie.
U la leit ruh ban jurip ïa ka jingpyntrei ïa ka jingïada ïa ka Wahumkhrah ba tip kum ka Wahumkhrah Riverfront Development Project.
Na ka liang u Myntri Rangbah u la kyntu ruh ïa ki paidbah ba kin snohkti lang bad ka sorkar ha kaban wallam ïaka khuid ka suba ha ki wah bad ki sawdong sawkun kum ka Wahumkhrah.
 | ReplyForwardAdd reaction |
