Shillong, Lber, 06: Ka Federation of Khasi Jaiñtia and Garo People (FKJGP), Khliehriat Circle, ka la mudui sha u Deputy Commissioner ka East Jaiñtia Hills District pyrshah ïa ka Dalmia Cement ha kaba la kynnoh ba ka la bret ïa ki jaboh harud ka surokbah National Highway-06 kaba hap hapoh ka shnong Umtyra.
Ha u kyrwoh ba la phah sha ki lad pathai khubor ryngkat bad ki video ha ka sngi Thohdieng lyngba u President u Bah Michal Chyrmang, ka seng ka la pyntip sha u Deputy Commissioner ba ïa kine ki jaboh la shu ieh kumto harud surokbah la bun bun bnai bad kiba lah ban buh jingma ïa ka koit ka khiah jong ki paidbah bad kumjuh ruh kaba long ka jingma ïa ki sawdong sawkun jong ka mariang.
Ka Seng ka la dawa ruh ïa u Deputy Commissioner ba u dei ban hukum ïa ka Dalmia Cement Limited ban pynkhuid noh mardor ïa ka jaboh khlem pynslem bad ban pynthikna ruh ba kane ka jingjia kam dei shuh ban dang jia nangne shakhmat.
