Babu Kular Khongjirem
Katba nangjan ka MDC Election, katta nang shongshit bad nang kylla ka jingmut jingpyrkhat jong ki paidbah. Ki paidbah ki la sngap bha īa ka jingkren jong ki nongīalam ki party bapher bapher bad ka sur ki nongkyrshan na manla ki constituency. Ha ka por MP Election, ym long īakren shuh īa ka ‘erlangthari jong u Prah.
Ka jingkhmih lynti ki nongīalam Prah mynta ka long ba kajuh ka lyer (waves) kan sar naphang lin manla ki MDC Constituency ha kylleng ka ri Khasi-Jain̈tia. Hynrei, imat, kane kam lah shuh satia ban jia ha kane ka samoi MDC Election. Imat, ka lyer ba beh ha ka aiom pyrem, ka īapher na ka lyer ba beh ha ka por lyiur, por synrai bad por tlang bad kumta ter ter.
Ka jingjop kput ka party Prah ha ka MP Election na Shillong Parliamentary Constituency ka la pynlong īa ki nongīalam jong katei ka party ba kin sngewsarong, sngewkhyllew, sngewmeng bad ban nym khein̈ briew shuh īano īano ruh. La i kumba ka dei pynban ka Very Proud People(VPP) lane kata ka Very Powerful Party(VPP). Ka jingsngew stad hangamei, ka jing act tip lut nanglut bad stad lut jong ki, la kum kita ki “I Specialists”. La i kumba, lada kren kiwei īa ki ym long, hynrei lada kren ma ki pat, ki kren katba mon la kum kiwei ki dei tang kum ki n̈iut ki n̈ier, ki puit ki khniang. Ki act la kumba ym don shuh kiba kham stad bad kham palat ka jingshemphang jong ki (more supreme) īa baroh kiba stad ha kane ka pyrthei stad mynta. La i kum ka kynhun Voice of Powerful People (VPP) ne ka Voice of Proud People (VPP) pynban.
Ka jingmaham ka ktien ki riewstad ka long ba ka jingsarong ka wan hashwa ka jingjot (pride goes before destruction). Ka jingsngew stad palat ruh ka pynisih īa ki riew shisha bad riewpyrkhat pyrdain̈ (Like minded people).
Ha ka jingshisha, shisien ba la īoh īa ka jingieit bad jingshaniah na ki paidbah, dei ban don shuh shuh ka jingsngewrit bad ka akor ka burom namar dei ka jinglehrit ne sngewrit kynthop ha ryngkat ka akor ka burom u briew kaba thaw pyrthei bad saindur īa ka longbriew man u briew wat haduh ka synshar khadar ruh.
Ngi īohi lyngba ki lad pathai khubor (social media) ba ki constituency Prah na Mawlai ka don jingma ha ki kyrtong Independent. Ka Headquater u Prah na Nongkrem ruh, lah i triem bad i shyrkhei shibun ka jingialeh bad u kyrtong shi met hi. Na ka constituency Prah jong ka Mawryngkneng/Sohryngkham ruh ka bym i thikna shuh. Ynnai īakren īa ka constituency Prah na North Shillong (Jaiaw bad Mawkhar) kaba ka jingīapyni nia ka jur bha, mano ba dei bad ba lait kaba la pynkulmar jingmut (confused) īa ki paidbah ba luilui bapli (innocent people). Tangba, lada jia ba ki Prah ki rem shisha na kitei ki saw (4) tylli ki constituency ba ki jop ha ka election MLA 2023, kata, ki la duh jingshaniah na ki paidbah, sa tang ha ki constituency thymmai ki lah ban jop namar “Tang kiba lah phong īa ka juti, ki sngewthuh ba thar u prek”.
Lada u Prah um ioh majority shisha ban thaw īa ka EC ha KHADC ne JHADC, ki ladei ban pyrkhat janai bha (post mortem) ne wad bha īa ki daw bah daw san (re-retrospective) khnang ba kin īoh biang ka jingieit bad ka jingshaniah na ki paidbah kylleng ka ri Khasi-Jaintia jong ngi ha ka MLA Election ka ban long ha u snem 2028.
