Shillong, Jylliew, 13: Ka Iingbishar Meghalaya High Court ka la bthah ïa ka Sorkar Jylla ban ai jubab khnang ba kan dup lah ban pyni ïa ki kam ba la leh katkum ka Meghalaya State Vendors (Protection of Livelihood and Regulation of Street Vending) Scheme, 2023.
Ka Division Bench kaba kynthup ïa u Chief Justice IP Mukerji bad u Justice W. Diengdoh haba buh sngi ban shong bishar ïa ki ar tylli ki PIL ba la ujor halor kane ka ishu haduh ka 3 tarik Naitung, ka la ong, “haduh ka 1 tarik, Naitung, 2025, ka Jylla ka dei ban phah ïa ka jubab ban pyni ïa ka kam ba la leh katkum ki kyndon ba ngi la kdew ha ka hukum bad katkum ka jingkdew ka skhim haneng bad ban phah ïa ka kopi sha u Advocate -on -Record na ka bynta ki nongujor.”
Ka bthah ruh ïa ka Jylla ban peit bha ïa ki jingkdew ba la pynpaw ha ka affidavit ba la ai da u nongujor.
Ka Bench ka la pynpaw ba ka don katto katne ki pasoh ba la pynpaw ha kata ka affidavit bad ka la ong, “ka paw ba watla ka Sorkar ka la shim ïa ki sienjam na ka bynta ban pynrung kyrteng ïa ki nongdie madan, ban ithuh bad ai ïa ki jaka die ryngkat bad ka jingthmu ban tei ïa ki katto katne spah tylli ki dukan die lang bad pdiang ïa ka polisi ban pynkynriah ïa ki nongdie madan sha ki vending zone, ka skhim ba ai kyrteng kum ka Meghalaya State Vendors (Protection of Livelihood and Regulation of Street Vending) Scheme, 2023 ym pat shym la pyntreikam.”
“Namarkata, ka jingeh kaba mih na ka jingshong die jingdie beaiñ harud surok bad ki lynti ïaid kjat bad ka jingkhapngiah ka dang ïai bteng. Ka jingma kaba ap ka long ïa ki khynnah kiba leit skul ha kaba kim don jaka shuh ban ïaid na ki lynti ïaid kjat bad ki hap ban ïaid na surok ha kaba ki lah ban ngat ha ki jingjia aksiden,” ka la bynrap.
Ka Public Interest Litigation (PIL) ka kynthup ïa ka jingithuh ïa ki surok ba la shong die jingdie, ka jingpynkynriah ïa ki jaka ba la shah ban pyndonkam na ka bynta ka jingdie jingdie ha surok, ka jingpynbeit ïa ka leit ka wan, ka jingai bad pynkynriah ïa ki jaka ieng kali, ka jingpynkylluid katba lah ïa ki surok ban ailad ïa ka jingïaid laitluid jong ki kali bad ka jingpyntreikam kyllum ïa ki polisi bad ki jingthmu ban pynlong ïa ka nongbah jong ka jylla Meghalaya, ka Shillong Region kum ka sor kaba khuid bad kaba lah ban pynbeit bha ïa ka jingsynshar ka khadar.
