Shillong, Risaw 09: Ka Hynñiewtrep Youth Council (HYC) ka la pynrem jur ïa ka jingshah pynïap jong u heprit Kyrshanbor Kharmudai ba dang 7 snem ka rta uba shong ba sah ha Nongrah.
Lah ban ong ba u heprit Kyrshanbor ula jah na la Ïingsah na Nongrah Lum Marboh ha ka por 4:30 baje janmiet ha ka 8 tarik bad ha ka step sngi Palei la lap ïa ka metjong u harud surok hajan ka khlaw Mawpat.
Ha ka kyrwoh ka HYC ka la pynpaw ïa ka jingbitar halor katei ka jingjia, da kaba buh jingkylli ïa ka jinglah jong ka Sorkar ban pynthikna ïa ka jingshngaiñ ha ka Jylla.
“Ym dei ban shah ïa kum kine ki kam runar, bad ka dei ka kamram jong ka Sorkar bad ki bor ka aiñ ban ïada ïa ki nongshong shnong bad ban ïada na kum kine ki jingjia ba sngewsih,” ong ka kyrwoh na ka seng.
Ka HYC ka la buh ruh katto katne ki jingkylli ha kaba ïadei bad ka bynta jong ka Sorkar ban pynthikna ïa ka jingshngaiñ da kaba kylli mano ban shim ïa ka jingkitkhlieh ïa kum kine ki jingjia bad ban pynthikna ba ka aiñ kan ïada ïa baroh ki nongshong shnong.
Ka seng ka la buh ka jingkylli da kaba ong, “Hato ka Sorkar bad ki Pulit ruh ki don ka jingkitkhlieh ban noh synniang sha ka jingkiew jong ki kam runar ha ka jylla?.”
Ka HYC ka la ban jur ba ka roi ka par ha ka Jylla kam don jingmut khlem ka jingshngaiñ. “Kaei kaba ngi donkam ka long ka jingshngaiñ bad ka dei ka kamram jong ka Sorkar Jylla ban pyndep ïa ka,” la bynrap ka HYC.
Ka HYC ka phah ruh ïa ka jingsngewlem sha ki bahaïing ha sem jong u heprit Kyrshanbor Kharmudai da kaba pynpaw ïa ka jingïasnohkti lang bad ki ha kum kane ka por kaba sngewsih bad kaba sngewkhia.
