Shillong, Nailar, 10: U Comptroller and Auditor General of India (CAG) u la pynpaw ïa ka jingsngewkhia halor ka jingshaniah jong ka Jaiñtia Hills Autonomous District Council (JHADC) ha ka jingïoh jingïarap pisa nabar bad u la ai jingmut ba dei ban ïa ki lad ki lynti ban pynbha ïa ka jinglum khajna na la ki jong ki tyllong.
Katkum ka kaiphod u CAG, ka jingshaniah jong ka JHADC ha ki tyllong ba ïoh pisa nabar ka long 89.50% ha u snem 2018-19, ha kaba tang 10.50% ka wan na la ka jong ka tyllong lum pisa.
Ka la ïathuh ba ka jingïohnong baroh jong ka Council ka la hiar da T.16.94 klur (17.56%) na ka T.96.47 klur ha u snem 2017-18 sha ka T.79.53 klur ha u snem 2018-19.
Ka daw jong ka jinghiar ka dei khamtam namar ka jinghiar ka bhah ïoh lum khajna na ki marpoh khyndew da T.17.86 klur (33%) na ka T.72.61 klur kaba la ïoh ha u snem 2017-18 sha ka T.54.75 klur ha u snem 2018-19.
Ka jinglah ban pynmih khajna hi jong ka Council ruh ka la hiar da T.2.93 klur (26%) na ka T.11.28 klur kaba la ïohlum ha u snem 2017-18 sha ka T.8.35 klur kaba la ïohlum ha u snem 2018-19.
Ha u snem 2018-19, na ka pisa kaba don T. 148.77 klur, kynthup ïa ka kynthup ïa ka Opening Account, ka Council ka la pyndonkam T.105.77 klur (71%).
Ha u snem 2018-19, ka JHADC ka la pynmih pisa T.8.35 klur na la ka jong ka tyllong lum pisa. Ka la ïoh T.59.42 klur kum ka bhah na ka khajna, T.0.13 klur kum ka Grant-in-aid na ka Sorkar Jjylla, bad T.11.63 klur kum ka jingïarap ba kyrpang na ka Sorkar India.
“Kumta, ka JHADC ka shaniah nyngkong eh ha ki tyllong pisa nabar (89.50%) ym na ka jingïohlum na ki tyllong pynmih pisa jong ka hi (10.50%),” la ong ka kaiphod.
“Ha u snem 2018-19, ka jingpynlut khajna baroh jong ka JHADC ka la kiew da 29.59 percent na ka T.81.61 klur ha u snem 2017-18 sha ka T. 105.77 klur ha u snem 2018-19.
Ka jingkiew ha ka jingpynlut khajna ha u snem 2018-19 ka long ha baroh ki bynta bakongsan kaba long hapdeng 11 bad 26 percent na ki snem ba ladep.
Watla ka la pynlut haduh T.22.53 klur hapoh ki kam pynroi- ka jingtei kaba kynthup ïa ka jingshna surok, ki iing skul bad kiwei kiwei, ka long ka jingpynlut pisa, hynrei ym shym la don kano kano ka jingpynlut pisa kaba la pynpaw ha ki jingkhein jingdiah ba manla u snem da ka Council.
Ka jingpynmih pisa baroh jong ka Council kaba la kot sha ka T.79.53 klur kaba pyni ba ka la hiar da 45% na ka jingkheiñ ha ka mang tyngka (T.145.50 klur) ha u snem 2018-19. Kumjuh ruh ka jingpynlut jong ka Council kaba kot sha ka 105.77 klur tyngka, ruh ka la duna bha na ka jingkheiñ mang tyngka (167.18 klur tyngka) da 37%.
U CAG u la ai jingmut ïa ka JHADC ban kham pynjanai ïa ka rukom lum khajna na la ki jong ki tyllong khnang ban pynduna ïa ka jingshaniah ha ka jingïoh pisa nabar.
Ka Council ka dei ban da pyrkhat bha ïa ka jingpyndonkam ïa ka pisa ha ka rukom khnang ban pynthikna ba ka jingpyndonkam ïa ka pisa ka dei ban long katkum ka bhah mang tyngka.
Ïa ki jingpynlut pisa dei ban pynbynta thikna bad ban da thoh hapoh ki tnat kiba biang ha ki jingkhein jingdiah ba manla u snem.
Ka Council ka dei ban pynlong ïa ka jingbishar bniah ïa ka mang tyngka ban ithuh ïa ki lad kamai bym pat pyndonkam bad ban kheiñ antad ïa ka jingmih khajna kaba kham thikna.
