Shillong, Jylliew, 17: Ki Pulit ka East Khasi Hills ha ka Lah Sngi u Blei ki la hiar sha Indore, Madhya Pradesh ban khynra ïa ka iing riehtngen jong ka Sonam Raghuvanshi ba ka la sah ha ki sngi ba ka la phet ïap phet im hadien ka jingpynïap ïa u tnga ïathoh jong ka u Raja Raghuvanshi ha jaka pynieng kali ha Wei Sawdong, Sohra ha ka 23 tarik, Jymmang.
U Superintendent of Police ka East Khasi Hills Bah Vivek Syiem ha ka jingïakren bad ki lad pathai khubor ha Sohra ha ka sngi Baar u la ong, “ka la don sa kawei ka kynhun Pulit na Meghalaya kaba la leit sha Indore ban khynra ïa ka iing ba sah ka Sonam. Nga dang shu ïoh khubor myntan hi ba ym don eiei shuh hangto (ha ka iing riehtngen). Ngi hap ban tohkit biang ïa kine shaei ki la rah ïa ka (ksiar ba la jah jong u Raja Raghuvanshi) lane ïoh ki don ki briew nangthie (Indore) kiba la rah ïa ki ksiar bad ïa ki mobile phone.”
“Kin (Pulit Meghalaya) dang sah ha Indore ban pynlong ïa ka jingtohkit kaba bniah halor kane,” u la bynrap.
