Shillong, Jymmang, 29: Ka Drug Reduction, Elimination, and Action Mission (DREAM) jong ka Sorkar Jylla ka la pynjur ïa ka jingtreikam ban ïakhun thma pyrshah ïa u drok da kaba pynïar ïa ka jingtreikam sha rilum Garo.
Ha ka sngi Balang, ïa ka jingïalang ba la pynlong ha Conference Hall jong ka ophis u Superintendent of Police ka West Garo Hills District la pynïaid da u Mission Director ka DREAM u Bah Francis G. Kharshiing.
Ka jingïakren ka la sakhi ïa ka jingïashim bynta na ki kynhun bapher bapher kynthup na u Superintendent of Police (SP) jong ka West Garo Hills, u Additional Deputy Commissioner, u SP Traffic, u District Social Welfare Officer, ki Psychologists, ki Mental Health Professionals, ki nongïalam shnong, ki nongïalam Balang, ki Nokma, ki dkhot jong ki Village Development Councils (VDC), bad ki nongmihkhmat na ki Non-governmental Organization (NGO) bapher bapher.
Ha ka jingïathir ïatai, u Bah Kharshiing, u la ïaiban ba donkam ban don ka jingïatreilang ban ïakhun pyrshah ïa u drok.
Ki mat ïakren ba kongsan ki kynthup ban weng ïa ka jingshah pynjah burom ki nongdih drok. Ka jingkyntiew ïa ka jinglong ba sngewrit bad kyrshan ïa ki briew kiba la ngop ha ka jingdih drok. Ka jingpyndonkam ïa ka teknoloji. Ka jingpyndonkam ïa u QR code ba la buh ha ka kalendar jong ka DREAM ban ïoh sumar ha ki Rehabilitation Centre bad ban ïoh jinghikai ha ki Vocational Training. Ban pyntreikam ïa ki lad sengkam ïa ki samla ki ban long kum ki lad ban ïada na ka jingshah pynngop ha u drok.
U Bah Kharshiing u la ong ba dei tang ka jingïatreilang ha ka imlang ka sahlang kaba lah ban weng ïa kane ka jingeh.
U la khot bad wer ïa iwei pa iwei ban ïasnohkti lang khnang ban pynlong ïa ka jylla Meghalaya kaba lait luid na u drok.
U Director u la ong ba ka jingleit sha rilum Garo ka long shi bynta ka thong treikam jong ka DREAM ban pynïasoh ïa baroh ki distrik jong ka jylla khnang ban pynsngewthuh ïa ki paidbah bad ban pynssngewthuh ruh ïa ki nongïashim bynta ha ka jingpyrshang ban pynduhjait ïa ka jingdih drok.
Ka Sorkar Meghalaya kan ïai bteng ïa ka thong ban pynduh jait ïa ka jingma jong u drok bad ban pynlong ïa ka jylla kaba lait na u drok na ka bynta baroh ki nongshong shnong jong ka, u la bynrap shuh shuh.
