Shillong, Naitung, 03: Ka Ïingbishar Meghalaya High Court ka la tuklar halor ka jingpynkynriah ïa ki nongdie madan ha ka thaiñ Khyndailad kaba dang ïaid mynta shakhmat bad bthah ruh ïa ki bor synshar bad ki bor Pulit ba ki dei ban bud ryntih ïa ka aiñ.
Ka seng ki nongdie madan ka la thep da ka aplikeshon da kaba kynnoh ba la pynkynriah jubor khlem da ai bujli ïa ka jaka die madan shawei pat.
Ha ka hukum ba la pynmih hadien ba la bishar ïa ka PIL ha ka sngi Palei, ka Division Bench kaba kynthup ïa u Chief Justice IP Mukerji bad u Justice W Diengdoh ki la thung ïa u Senior Advocate Subhasis Chakrawarty kum u Special Officer ban peit ïa ka jingpyntreikam ïa ki jingbthah jong ka Ïingbishar.
“Halor baroh, u Special Officer da ka jingstad, ka jingshemphang, ka jinglong rangbah un pynthikna ba ki hukum jong ngi ha kane ka Public Interest Litigation (PIL) kin pyntreikam khlem kano kano ka jingpynkheiñ ïa ka shongsuk ne leh ïa kano kano ka kam runar,” ka la ong.
Ka Bench ka la bthah ruh ïa u Special Officer ban pynkhreh ïa ka thup jong ki nongdie madan kiba la ai bor bad kiba la ïoh laisen, ba la pynpaw ba ki don haduh 349 ngut, da kaba ïamir jingmut bad ka seng jong ki nongdie madan bad ki bor synshar.
Ka Ïingbishar ka la bthah ba ki nongdie madan kiba don laisen yn shah ban die jingdie ha ka thaiñ Police Bazar ha ki kynta ba la buh (12:30 baje noh sngi haduh 2 baje mynsngi bad 7:30 baje janmiet haduh 9 baje mynmiet), katkum ka jingkular jong ki ban ym palat ïa ka por ba la buh bad ban ym pynthut ïa ka leit ka wan jong ki kali ne ka ïaid ka ieng jong ki briew. Yn ym shah ïa ki nongdie madan ki bym don laisen ban die ïa ki mar ki mata ha kane ka thaiñ.
“Lada don ka jingpynkheiñ, u Special Officer ryngkat bad ki bor synshar bad ki bor Pulit kim dei ban ailad ïa uno uno u nongdie mar ban die ha katei ka jaka,” la ong ka Ïingbishar bad bynrap, “u General Secretary jong ka seng ruh un shimkhia ban ai jngtip sha ka Ïingkashari bad un pynthikna haba ïa ka jaka die jingdie la pynbiang da ki bor synshar, u dei ban kynriah noh mardor. Lada um leh ïa kata dei ban kyndang noh mardor na ka jaka die jingdie.”
Ka Ïingbishar ka la bthah ïa ki nongdie madan ban kynriah noh ïa ki jaka ba la mang da ki bor synshar bad kiwei pat ki nongdie madan ki lah ban nang aplai ïa ka laisen.
“Kiwei pat ki nongdie madan kin long kiba laitluid ban thep ïa ki aplikeshon hakhmat ki bor ba dei peit ban ïoh ïa ka laisen kaba biang kaba lah ban bishar bniah da kita ki bor katkum ka aiñ. Hadien ba la ïoh ïa ka kaiphod na kita ki bor ha kaba ïadei bad kita ki aplikeshon kane ka Ïingbishar kan sa pyrkhat ban shimkhia shuh shuh ha kaba ïadei bad ki,” la bynrap ka hukum.
U Special Officer un pynthikna ba dei ban pyntreikam da kaba suk ïa ka hukum jong ka Ïingbishar bad un aiti ïa ka jubab ha ka 5 tarik, Nailar, 2025.
