Shillong, ïaïong, 14: Ki bor ba dei peit jong ka Meghalaya State Pollution Control Board (MSPCB) ha ka Lah Sngi u Blei ki la phah da ka jingthoh sha ka Om Om Coke da kaba hukum ban pynsangeh noh ïa ka jingthmu ban shna ïa ka Lam Coke Manufacturing Unit hapoh u pud u sam jong ka shnong Wapungskur, East Jaiñtia Hills District.
Ka jingpynmih ïa ka hukum ba la soi da u Member Secretary jong ka MSPCB u Dr. GH Chyrmang ïa kaba la phah sha ka M/s Om Om Coke ka long hadien ba ka ophis ka la ïoh pdiang ïa ki shithi ba la weng noh ïa ka No Objection Certificate (NoC) da u Dolloi jong ka Elaka Jowai u Bah Puramon Kynjing bad da u Waheh Shnong jong ka Dorbar Shnong Mookhep u Bah Denis Siangshai.
“Ha kaba ïadei bad kane, la bthah ba phin pynsangeh noh ïa kino kino ki jingtei ha kaba ïadei bad ka jingshna ïa ka Coke Factory ha Thlukure Wah Tongtiang, East Jaiñtia Hills District,” ong ka hukum na ka Board.
Ha ka jingïakren bad ki lad pathai khubor, u Waheh Shnong jong ka Dorbar Shnong Wapungskur Bah Postling Dkhar ula pyntip ba ka Board ka la shim ïa kane ka rai hadien ba ka Dorbar Shnong ka la aiti ïa ka jingpyndam noh ïa ka NoC ba la ai da u Dolloi ka Elaka Jowai bad da u Waheh Shnong ka Mookhep.
Kum ban shu pyntip hangne ba ka jingpyrshah jong ka Dorbar Shnong Wapungskur ka long hadien ba u Dolloi ka Elaka Jowai bad u Waheh Shnong ka Mookhep ki la ai NoC sha ka Om Om Coke ban shna ïa ka Coke Plant hapoh u pud u sam jong ka shnong Wapungskur khlem ka jingtip jong ka Dorbar Shnong.
