Shillong, Jymmang, 22: U District and Sessions Court, Jowai u N.A Khan ha ka 20 tarik mynta u bnai u la rai pynrem da kaba set along hynriew bnai ïa u Silas Sten na ka shnong Mukroh hapoh ka Section 448 bad 323 IPC ha kaba ïadei bad ka Criminal Case ba la rejistar ha u snem 2016.
U kyrwoh ba la phah da u Superintendent of Police, West Jaintia Hills Bah C. Syrti ha ka sngi Palei ula pyntip ba u Bah Shngaiñ Niang u la ujor da ka ejahar ha ka 8 tarik, Nailur, 2016 da kaba kynnoh ba ha ka 3 tarik, Nailur 2016, u nongshah mudui u la rung jubor hapoh ka ïing jong u ha ka por 10 baje mynmiet bad byrngem da kaba pynap tari bad hadien kata u la maham ruh ïa ka tnga jong u. Ïa ka case la rejistar ha Jowai Police Station hapoh ka Section 444/506/376 IPC bad ïa ka jingtohkit la bynshet ha ka WPSI J. Nongsiej kaba la pynngat ruh da ki kyndon.
