Shillong, Nailar, 27: Ka Kashari jong u District & Sessions Judge, Jowai, u N.A Khan ha ka 25 tarik mynta u bnai ka la ai jingpynshitom da kaba hukum ban set phatok shi rta jingim ïa u Weslyborn Pala ba ju khot sin u Nana Pala na ka shnong Barato hapoh ka Section 302 IPC bad daiñ kuna san hajar tyngka halor ka kam pynïap briew.
U Superintendent of Police jong ka West Jaiñtia Hills ha u kyrwoh u la pyntip ba ha ka 7 tarik, Nailar, 2009 ka Kong Eragina Timung, ka khun jong uba shah pynïap ka la ujor da ka ejahar ha u In-Charge jong ka Nartiang Police Investigating Centre (PIC).
Ha ka ejahar ka la pyntip ba ha ka miet 6 tarik, Nailar, 2009 ha ka por kumba 8:00 baje mynmiet, u Wesly Pala u la pynïap ïa u Bransely Suiai da kaba mait ïa u da ka wait, kat haduh ba u la ïap hashen.
Ïa ka Case la register ha Jowai Police Station hapoh ka Section 302 IPC bad la leh ïa ka jingtohkit bad pynngat kyndon da u SI W. Vaichei.
