Shillong, K’lyngkot, 24: U Myntri Rangbah ka Jylla, u Conrad K Sangma u la ai hukum ïa ki ophisar ba ki dei ban pynshitom ïa kino kino ki nongtrei Sorkar lada lap ba ki wan trei hapdeng ka jingbuaid kyiad.
U Myntri Rangbah u la pynpaw ïa kane hadien hadien ka jingïamir jingmut bad ki paitbah jong ka thaiñ Ranikor ha ka Block Level Community Interaction Programme lyngba ka CM Connect programme ha kaba kawei ka longkmie ka la phla hakhmat u Myntri Rangbah ba ki nongtrei sorkar kiba la leit beh ïa ki hati khlaw kiba pynjot ïa ki iing ki sem bad ïa ki jingthung jingtep ha ka thaiñ Ranikor pat ki la wan hapdeng ka jingbuaid kiad kat haduh ba bad kim nang shuh ban treikam.
Mar mar u Myntri Rangbah u la khot shakhmat ïa u Range Officer jong ka Nongstoin ban tohkit markhmat na u bad ai hukum ruh ba un pynshitom ïa ki nongtrei kiba buaid kiad hapdeng ka kamram.
Kiwei pat ki mat ba ki paitbah kane ka thaiñ ki la pynsngew ha u Myntri Rangbah ki kynthup ïa ki surok, ki skul, ka umbam umdih, ka bording ilektrik, ka jingbym ïoh skhim shuh ïa ki bym pdiang Aadhaar Card bad kumjuh ruh ki kam jngohkai pyrthei.
La synran lang ïa u Myntri Rangbah da u MLA ka Mawkyrwat u Bah Renikton L Tongkhar, u MLA jong Ranikor u Bah Pius Marwein bad ki ophisar na ki tnat treikam bapher bapher.
