Shillong, Naitung, 22: Ban ïada ïa ka koit ka khiah jong ki paidbah kiba lah ban ngat ha ki jingpang na ka jingring ïa ka tdem duma, ki Pulit jong ka East Khasi Hills ki la pyntreikam ïa ka Cigarettes and Other Tobacco Products Act (COTPA), 2003, da kaba daiñ kuna ïa ki briew kiba dih duma ha ki jaka paidbah bad ïa ki nongdie dukan kiba die ïa u duma hajan ki skul bad ki kolej.
Ha ki lai bnai ba la leit noh, 1178 tylli ki Challan ladep ai bad T. 99,280 hajar la ïoh lum na kaba daiñ kuna, ka ban long kum ka nuksa kaba khlaiñ ban khanglad da ka aiñ ïa ka jingdih duma.
Ki Pulit ka Cantonment Beat House bad ka Lumdiengjri Police Station, ki la daiñ kuna bun ngut ki briew kiba dih duma ha ki jaka paidbah.
Ïa ka jingpyntreikam ïa ka aiñ COPTA la leh ha manla ki Police Station, ki Outpost bad Beat House kylleng ka District.
Ka jingpyntreikam ïa kane ka aiñ ka long kum shi bynta ka jingpyntreikam ïa ka National Tobacco Control Programme ba la wanrah da ka tnat Health & Family Welfare hapoh ka National Health Mission, Meghalaya.
“Kane ka sienjam kam long tang ban shu daiñ kuna, ka long kumno ban pynkylla ïa ka jingmlien basniew bad ban ïada ïa ki khynnah, kiba la heh la san, bad ïa kiwei pat ki bym dih duma. Ka thong jong ngi ka long ban pynlong ïa ka Meghalaya kaba lait na u duma,” ong u kyrwoh na ki Pulit.
Kane ka sienjam ka la ïoh jingkyrshan bha na ki paidbah.
Uwei u samla pule jong ka St. Anthony’s College u la ong, “ki don ki khynnah bad kiba la kham rangbah kiba la ngat ha ka jingshitom tang na ka daw ka jingring mynsiem ïa ka tdem duma. Ki Pulit ka Meghalaya ki dang leh ïa ka kamram ban ïada ïa ka jingim jong kiba bun..”
Ka State Nodal Officer jong ka NTCP ka Dr. Nabneeta D. Mawrie ka la bynrap, “u duma u pynmih 40% na baroh ki jingpang bampong bad 90% na ki jingpang bamong ha ka shyntur. Ka jingpynduh ïa u duma ka lah ban pynim ïa kiba bun ki mynsiem. Ngi sngewnguh ïa ka sienjam ba radbah jong ki Pulit.”
Ka jingpyntreikam jong ka tnat Pulit Meghalaya bad ka NTCP Meghalaya ïa ka aiñ kaba khang dih duma ha ki jaka paidbah ka long ban wanrah ïa ki sawdong sawkun bad ïa ki jaka paidbah kiba lait na ka jingdih duma bad ban ïada ïa ka jingim jong ki briew.
