Shillong, Naiwieng, 14: Ka jingialehkai hapdeng ka Shillong Lajong bad ka Sreenidi Deccan ka la kut noh da ka jingiakhaid kaba mar 2-2 kol ha ka lympung ialehkai I-League kaba la long ha ka sngi baar ha madan SSA Stadium, Shillong.
Ka jingiakhun ka long kaba itynnat na baroh ar liang hadien ba ka Sreenidi ka la pynkhih ia ka jar tang hapoh 10 minit ba la sdang ka jingiakhun lyngba u Rosenberg Gabriel uba la ioh thep ia ka kol ha ka minit kaba 7 hynrei ka Shillong Lajong ka la pynlehnohei ia ki kabu ba la ioh naduh kaba sdang bad dei tad ha ka minit kaba 24 u Ronney Willson Kharbudon u la pyniakhaid ia kane ka shi kol da ka jingiarap jong u Sangti Janai Shianglong .
Hadien ba la pyniakhaid ia ka jingiakhun, ka Lajong ka la nang ioh bor bad dei ha ka minit kaba 34 lyngba u nongialehkai ba shakhmat na ka ri Japan u Takuto Miki ka la lah ban tam ia ka jingiakhun da 2-1 kol.
Ha ka jingiakhun ha ka kylla miet ka Lajong ka la pyrshang ban pynsuki ia ka jingialehkai hynrei ki rangialehkai jong ka Sreenidi ki la pyrshang borbah ban pynpra ia ka Defend Line jong ka Lajong ban ioh pyniakhaid ha ka minit kaba 63 lyngba u Rosenberg Gabriel uba la ioh thep ar tylli ki kol ha kane ka jingiakhun.
Ka dei ka jingialehkai kaba itynnat bha bad kaba la pynshongshit haduh katta katta ia ki nongkyrshan kiba sakhi ia kane ka jingiakhun kaba la kut noh da ka jingiakhaid kaba mar 2-2 kol tad haduh ba ka khyllipmat ba khatduh ba u Referee un pynkut ia ka jingialekai.
Ki jingiakhun jong ka Shillong Lajong kiba la shu kut noh ha ki jingiakhaid ha ki lai tylli ki jingialehkai ka la ioh khur mynta 3 poiñ bad mynta kan hap ban pynkhreh ban mih madan sa ha ka jingiakhun ka ban sa long pyrshah ia ka Gokulam Kerala FC na ka jylla Kerala ha ka 19 tarik, Naiwieng, ha ka por 2 baje nohphai sngi ha madan SSA Stadium, Shillong.
