Shillong, Naitung, 17: Shen u Symbud Myntri Rangbah ka Jylla uba khmih ïa ka tnat Kam Pohïing u Bah Prestone Tynsong un sa lum ïa ka jingïalang jong ki MLA na ki Constituency kiba hap hapoh ka East Khasi Hills District ban ïathir ïatai halor ka jingkynrei ki nongdih bad ka jingwanrung u drok bad ka jingkynrei ki briew kiba ïabit ïa u khñiang jingpang HIV/AIDS.
Ha ka jingïakren bad ki lad pathai khubor ha ka sngi Palei, ka Myntri ka tnat Koit ka Khiah ka Sorkar Jylla ka Dr. Ampareen Lyngdoh kaba long ruh ka MLA jong ka East Shillong Constituency ka la ong, “dang ha ka Lah Sngi u Blei ngi la pynsngew ha u Symbud Myntri Rangbah ka Jylla Bah Prestone Tynsong ban lum ïa ki MLA na ki Constituency kiba hap hapoh ka East Khasi Hills District ha ka 23 tarik mynta u bnai ban ïathir ïatai bad ban wanrah ïa ka thong kumno ban kren halor ka jingkynrei ki briew kiba pyndonkam ïa u drok, ka jingsaphriang ka jingpang HIV/AIDS, kumno ban kren shaphang ka jingphikir ha ka shongkha shongman bad kumta ter ter.”
“Ha ka jingsngew jong ngi, ki MLA ki dei kiba hakhmat tam jong ki paidbah bad ngin khmih, ngin sngap bad ngin peit ïa ka jingai jingmut bad ngin hap ban wad ïa ki lad ki lynti kumno ban pynsangeh ïa ka jingkiew stet jong ka jingpang HIV/AIDS ha ka district jong ngi. Nga kyrmen ba kane kan dei kawei na ki rynsan ïathir ban ïatreilang hapdeng ka tnat ka Koit ka Khiah, ka tnat Social Welfare bad ki bor pynïaid jong kine ki ar tylli ki tnat khnang ba ka prokram kaba ngin aiti sha ka Sorkar kan long kaba treikam,” la ong ka Myntri.
Haba kylli, ka Dr. Ampareen ka la ong, “ka don ka jingktah haduh katta katta ïa ka imlang ka sahlang na ka jingjyllei jong u drok bad ka dei pat sa ka kamram jong ki bor synshar shnong lane ki nongshong shnong ryngkat bad ki Pulit kaei kaba ngi donkam ban leh. Kine ki tnat ki don la ka jong ka jong ka bynta. Ka bynta jong ka tnat ka Koit ka Khiah ka long ban ngi dei ban long kiba kloi ban kren ïa ki (ba la ngop ha u drok) bad ban ïarap ïa ki ym ban khynñiat ïa ki sha kyndong ha kaba kin nang mih shuh shuh kiwei pat ki jingeh ha ka imlang ka sahlang.”
“Ngim dei ban shah ïa ka jingtip kaba tang nalor, ngi donkam ban rung sha ki iing ki sem ban ïakren ïa kane ka ishu khnang ba ngin ban dup lah ban ïada ïa ka jingpang HIV/AIDS bad ka jingkynrei jong u drok,” ka la ong.
Haba kylli halor ka jingjur ki kam runar ruser bad ki jingshah thombor jong ki kynthei, ki khyllung khynnah, ka Myntri ka Koit ka Khiah ka la ong, ‘ka jingthombor ïa ki longkmie, ïa ki kynthei mynta ka la ktah wat ruh ïa ka jingthombor ïa ki khylung khynnah. Kane ka dei kaei kaei kaba ngi dei ban ym shah ba kan kynrei bad kumba nga ju ong borabor ba ki longing ki longsem ki dei ki tyllong ban pynphriang ïa ka shongsuk shongshngaiñ ha ka imlang ka sahlang.”
“Ban shu kren shaphang ka jingeh, ka bynta ba kongsan jong ngi ki nongïalam ha kane ka jylla jong ngi, ngi hap ban phai dien kiei kita ki sienjam ba ngi dei ban shim na ka bynta ban peit ïa ka jingshong shngaiñ jong ki khyllung ki khynnah bad ki kynthei. Ka dei kaba jylliew bha ka mat,” ka la bynrap.
“Nga ïawer ïa ki Dorbar Shnong, ïa ki Nongïalam Niam bapher bapher ba ka ladei ka por ban shong ïathir ïatai sa kawei pat ka bynta na ka bynta ka jingai jingïarap lyngba ka aiñ (legal aid) na ka bynta kito ki bym don. Kaei ka jingpynkhreh jong ngi ban ïarap da kaba pynïoh ïa ki nongïasaid aiñ kiba tbit ban ïarap ïa ki lanot wat lada kim don shuh ha kane ka sla pyrthei hynrei ki bahaing hasem ki dang donkam pat ïa ki jingïarap ha ka liang ka aiñ. Kum ka Sorkar ngi hap ban leh eiei ban pynjanai ïa ka ïoh ka kot jong ki bad ban peit ba kata kan longdoh longsnam khnang ba baroh ki nongshong shnong kin sngew shngaiñ,” ka la ong.
“Ngim da kwah ban kyllum lut haduh ïa baroh ki mat ïatai bad ha kato ka sngi ngin shu ïakren beit bad ki MLA bad ban ïathir ïatai halor kaei kaba ka Sorkar dei ban leh na ka bynta ban pynsangeh ïa ka jingkiew stet ka jingpang HIV/AIDS,” la bynrap shuh shuh ka Dr. Ampareen.
