Shillong, Jylliew, 23: U Myntri ka Sorkar Jylla uba khmih ïa ka tnat Pule Puthi u Rakkam A. Sangma ha ka Lah Sngi u Blei u la pynshai ba ka jingpyllait ïa ka Umbrella Scholarship na ka bynta ki khynnah pule riewlum la siew ha ka Installment khnang ban pynthikna ïa ka jingsam marbiang sha baroh ki nongïoh jingmyntoi.
Ka Ministry ka la pyllait ïa ka Installment ba nyngkong bad ïa ka pisa la phah ruh sha ki Bank Account jong ki khynnah pule.
Ha ka jingïakren bad ki lad pathai khubor, u Myntri u la pynshai ba mynshwa ka Ministry ka ju pyllait baroh ka pisa sha ki 20,000 ngut ki khynnah skul, katba ïa kiba sah sa 40,000 hajar kin hap ban ap ïa ka jingpyllait pisa ha ka sien kaba ar. Hynrei mynta ka kynti ka Ministry ka la rai ban pyllait ïa ka pisa ka ban sam mar ïaryngkat sha baroh ki nongïoh jingmyntoi katkum ka jingpyllait ïa ka pisa.
U Myntri ula pyntip ruh halor ka Chief Minister’s Scholarship Scheme, ba ïa ka jingpynbna paidbah halor kane ka skhim ym pat lah ban pynmih. Tang shu pynmih ïa ka jingpynbna, ki khynnah pule kin ïoh ïa ka baibam kaba T. 6,000 marwei na ka CM’s Scholarship Scheme, nalor ba ki ïoh na ka Umbrella Scholarship ba la ai da ka Tribal Ministry ka Sorkar India.
U Sangma u la kular ruh ba ka jingsam ïa ka pisa baibam yn sa pyndep noh ha ka ar bad lai tylli ki Installment ki ban sa pyllait. U la ïathuh kumba 6,000 haduh 7,000 hajar ngut ki nongïoh jingmyntoi ki ïakynduh jingeh ruh bad ki Bank Account jong ki, kaba lah ban pynslem ïa ka jingïoh pdiang ïa ka baibam.
U Myntri u la kyntu ïa ki khynnah pule ba ki dei ban pynthikna ba ki Bank Account jong ki dei ban pynïasoh bad u Aadhaar khnang ban lait na kino kino ki jingeh ha kaba ïadei bad ka jingïoh ïa ka pisa baibam.
