Shillong,, Rymphang, 21: Ka jingthep vote na ka bynta ka elekshon sha ka Jaiñtia Hills Autonomous District Council (JHADC) ka la kynjoh sha ka 85.58 percent hadien ba la lah ban pynlong biang ïa ka jingïathep vote da kaba ïaid beit ha ki saw tylli ki polling station jong ki ar tylli ki Constituency ha East Jaiñtia Hills ha ka sngi Saitjaiñ, katba ka jingpoi jong ki nongthep vote ha Khasi Hills Autonomous District Council (KHADC) ka long 76.77 percent.
Ka elekshon sha ki 58 tylli ki District Council Constituency, kata, mar 29 Seat ha KHADC bad JHADC ka la long hynnin ha ka sngi Thohdieng
Hapoh ka JHADC, ka Sumer Constituency ka dei kaba bun tam ki nogthep vote kaba kynjoh haduh 91.46 percent katba ka Jowai North ka dei kaba duna tam ka jingpoi jong ki nongthep vote kaba long tang 75.28 percent.
Ka Maskut Polling Station kaba hap hapoh ka Moodymmai-Nongkhroh Constituency ruh ka la sakhi ïa ka jingpoi bun bha ki nongthep vote kaba kynjoh haduh 99.52percent bad Khaddum Polling Station kaba hap hapoh ka Saipung-Nongkhlieh Constituency ka dei kaba duna tam ka jingpoi jong ki nongthep vote kaba long tang 51.34 percent.
Ka Wapung Skur A bad Wapung Skur Polling Stations kiba hap hapoh ka
Musniang-Rangad Constituency ki la sakhi ïa ka jingbun ki nongthep vote haduh 85.12 percent bad 83.33 percent hadien ba la pynlong biang ïa ka jingïathep vote ha ka sien kaba ar.
Ka jingpoi jong ki nongthep vote ha Bataw A bad Bataw B kiba hap hapoh ka Bataw-Lakadong Constituency ka long 80.58 percent bad 77.43 percent.
Ïa ka jingïathep vote la bthah ban pynlong biang hadien ba ki briew ki bym lah satia ban ithuh durkhmat ki la rung jubor hapoh ki saw tylli ki polling station bad pynpait ruh ïa ki Electronic Voting Machine (EVM) ha ka sngi Thohdieng.
Ha KHADC, ka Nongspung-Sohiong Constituency ha East Khasi Hills ka la sakhi ïa ka jingkiew bha ka jingpoi jong ki nongthep vote kaba kynjoh haduh 86.09 percent katba ka Nongthymmai Constituency ka dei kaba poi duna bha ki nongthep vote, kata, tang 59.75 percent.
Ka polling station kaba poi bun bha ki nongthep vote ka dei ka Maw-Ah kaba hap hapoh ka Langkyrdem-Laitkroh kaba kynjoh haduh 96.99 percent bad ka polling station kaba poi duna bha ki nongthep vote ka dei ka Madanrting Thembasuk Rum-A kaba hap hapoh ka Nongthymmai Constituency ka long tang 4.49 percent.
Na ki 272 ngut ki kyrtong, 158 ngut ba kynthup ïa ki 12 ngut ki kynthei ki dei kiba don ha ka jylli ïakhun na ki 29 tylli ki Constituency jong ka KHADC bad 114 ngut ki kyrtong kynthup ïa 7 ngut ki kynthei ki dei kiba ïakhun ha ki 29 tylli ki Constituency jong ka JHADC.
Ki don haduh 13,08,818 ngut ki nongthep vote ha KHADC bad JHADC ki ban thep ïa ka vote, kata, kynthup ïa ki 6,32,347 lak ngut ki shynrang bad 6,76,467 ngut ki kynthei.
Ka KHADC ka don baroh 9,96,518 lak ngut ki nongthep voter ha kaba 4,81,268 ngut ki dei ki shynrang bad 5,15,247 ngut ki dei ki kynthei.
Ka JHADC ka kham duna ïa ka jingdon jong ki nongthep vote, kata tang 3,12,300 lak ngut ba kynthup ïa ki 1,51,079 lak ngut ki shynrang bad 1,61,220 ngut ki kynthei.
Ka jingñiew ïa ki vote kan long ha ka 24 tarik Rymphang 2025.
