Shillong, ïaïong, 01: Ka sur ba pyrshah ïa ka lynti Rel ka la sawa ha sor Khliehriat, East Jaiñtia Hills District ha ka sngi kyrsiew ri ba la pynlong da ka Khasi Students Union (KSU) ha ka sngi Thohdieng.
Ka KSU ka ju rakhe ïa ka sngi kyrsiew ri ne ka Khasi National Awakening Day manla ka 4 tarik Ïaiong kum ka jingkynmaw ïa ka sngi kaba u Syiem Tirot Sing u la pynbna thma pyrshah ïa ka jingleh donbor ki Phareng ha 4 tarik, Ïaiong, 1829. Ka jingpynlong ka KSU ïa ka jingkynmaw ïa ka sngi kyrsiew ri ka long ban pyrshah ïa ka jingtyrwa jong ka Sorkar Jylla ban pynpoi ïa ka lynti Rel sha rilum Jaiñtia. Dang khyndiat sngi ka Sorkar ka la thaw da ka All Party Committee on Railway ban khot ïasyllok bad ban ïathir ïatai ïa baroh ki kynhun bapher bapher kiba pyrshah, kiba kyrshan bad kiba shu ieng pdeng khnang ba kin dup lah ban pynsngew ha ka jingïalang shwa ba ka sorkar kan dup lah ban shim ïa ka rai ba khatduh.
U President ka KSU samla Lambokstarwell Marngar haba kren ha ka jingïalang kaba la long hakhmat u durmot jong u Woh Kiang Nangbah u la pynkynmaw ïa ka jinglen lade bad ka jingaiti lut jong u Syiem Tirot Sing bad kiwei pat ki khlawait ban ïada la ka jong ka jaidbynriew.
U la kren diaw ïa ka jingleh mynthi ka Sorkar Pdeng ïa ka jingdawa ban pynrung ïa ka Ktien Khasi ha ka Khyrnit Baphra lada ïanujor bad ki ktien jong kiwei pat ki ktien kiba shong basah ha kane ka thaiñ Shatei Lammihngi.
“Lada ka shah ka kam ngin hap ban ïaid da kano kano ka lynti ruh. Kynmaw tang kawei, kam pher la ngi dei na kano kano ka thaiñ, na kano kano ka kur, na kano kano ka jait ka khong ngim dei ban ailad ïa kiwei ba kin knieh noh ïa ka hok bad ka iktiar jong ka ri bad ka jaidbynriew,” u la ong.
U President ka KSU u la ong shuh suh, “haba ngi kren ïa ki mat ki jura, ki ong ba kine ki dei ki nongpynkulmar shnong, kine ki nongpynshit. Ngan ïai pynshit ïa ki samla jong ka jaidbynriew ban long ki shakri bad ki païa ba skhem jong ka jaidbynriew baroh kawei. Wat ju tieng wat ju smiej haba phi kren ïa ki jingshisha.”
Haba pynkynmaw ïa ka jingjia ha u snem 2017 ha them Ribhoi, u President ka KSU u la ong, “ka Sorkar Jylla ka la thom da ka bor ban shna ïa ka lynti rel, ka seng da ka mynsiem ba shlur ka la thom da ka bor lyngba ki dkhot ha kaba la lah ban pynsangeh.”
Da kaba kynthoh ïa ka jingthaw jong ka Sorkar ïa ka All Party Committee on Railway, u samla Marngar u la ong, “ko kiba kwah lynti rel, mynta ka sngi tang katne khyndiat ngut kin wan, lada shah ka ïa bad lada poi ka por, kan long ar shah ngin wan ban pynsangeh ïa ka jingthmu basniew katba ym pat urlong ki jingdawa jong ka ri bad ka jaidbynriew.”
“Nga phah lypa ïa kane ka kyrwoh sha ka sorkar bad ki bor district ba kin (shna) pynheh lypa ïa ka along hangne ruh ba ngi kloi ban wan shong na ka bynta ka dawbah jong ka ri bad ka jaidbynriew baroh kawei. Nga ju ong ba ka ing byndi ka dei ka skulbah. U Tirot Sing u dei u khlawait jong ka jaidbynriew u la shah pynryngkang par ban shah set byndi. U Kiang Nangbah u dei u khlawait uba la shah sdien phasi. Ka jingïakren ha kine ki sngi ka long ki don kiba la sdang ban set byndi ïa ka jaidbynriew bad ki don kiba la sdang ban phasi ïa ka ri bad ka jaidbynriew. Ka dei ka kamram jong nga bad jong phi ban ïada na ki jingthmu kiba sniew kiba ap kmang kumno ban pynïap ïa ka ri bad ka jaidbynriew,” la ong shuh shuh u samla Marngar.
U la ong shuh shuh ba ka jingpharia shnong, ka jingpharia thaiñ, ka jingpharia kur kam dei ban suhthied ha ki jingmut jingpyrkhat hynrei ngi dei ban kynmaw ba ngi dei ka ri jong ki Laiphew Syiem bad ka ri ki Khatar Dolloi.
Katba u President jong ka Hynñiewtrep National Youth Front (HNYF) Bah Sadon Blah haba kren ha ka jingïalang u la ong ba ka Sorkar ka la pyrshang ban pharia ïa ka jaidbynriew namarba nyngkong la tyrwa ban wanrah ïa ka lynti Rel sha Ribhoi District hynrei namar ka jingpyrshah na ki sengbhalang la tyrwa ban pynkynriah noh sha rilum Jaiñtia.
Shwa kane, ki dkhot jong ka KSU ki la ïaid rally madan phutbol Dkhiah West bad pynkut pat hakhmat jong u durmot u Woh Kiang Nangbah ryngkat ka risa ka kynhoi ïa ki jingpyrta sur pynrem ïa ka Sorkar da kaba rah ruh ïa ki plakad kiba don ïa ki jingthoh bapher bapher.
La sakhi ruh ba ki bor synshar jong ka East Jaiñtia Hills District ki la pynkhlaiñ bha ïa ki bor pahara khnang ban tem ïa kino kino ki jinghuri hura kiba lah ban mih ha ka por bym poi pyrkhat.
Nalor kata, la sakhi ba ka shnong Khliehriat ka la kynjah jar ha kane ka sngi bad baroh ki dukan ki la khang khyrdep naduh mynstep.
