Shillong, Lber, 19: Ka seng kieng atiar Hynniewtrep National Liberation Council (HNLC) ba la shah kheiñ be-aiñ ka la rai ban ïakhun pyrshah ïa ka rai jong ka Sorkar Pdeng kaba la pynjlan ïa ka jingñiew be-aiñ ïa ka seng na ka bynta san snem.
Haba pyntip ïa kane ha ka sngi Balng, u nongmihkhmat jong ka HNLC uba long ruh u President jong ka Hynñiewtrep National Youth Front (HNYF) Bah Sadon K. Blah u la ong ba ka HNLC ka la thung da u nongsaid aiñ uba mihkhmat ïa baroh ki Case na ka bynta ban ïakhun pyrshah ïa ka rai jong ka Sorkar Pdeng ban pynjlan ïa ka jingkheiñ be-aiñ hakhmat ka Unlawful Activities (Prevention) Tribunal ha ka sien shong bishar ka ban sa long ha nongbah Shillong ha ka 22 tarik mynta u bnai.
Ïa u Bah Fernando Shangpliang ka HNLC ka la thung kum u nongsaid aiñ ha ka 6 tarik mynta u bnai.
Lah ban kdew hangne ba ka Ministry of Home Affairs ka la pynmih ïa ka jingpynbna ha ka 14 tarik, Naiwieng, 2024 kaba pynbna ïa ka HNLC, ryngkat lang ïa baroh ki shnat treikam kum ki kynhun leh be-aiñ kaba treikam mardor naduh ka 16 tarik, Naiwieng, 2024 na ka bynta san snem.
Ka jingpynbna na ka MHA ka la wan shiphew bnai hadien ba ka HNLC ka la weng noh na ka miej jingïakren ïasuk bad ka Sorkar ha u Kyllalyngkot, 2024.
Haba kylli, u Bah Blah u la ong, “ka daw ba ka HNLC ka kwah ban ïakhun ïa kane ka kam da ka lynti jong ka aiñ ka long namarba ha ki khep ba la sdang ka jingïakren ïasuk haba ki nongïalam jong ka HNLC ki la wan sah ha nongbah Shillong, ngi la buh shakhmat ha kaba bun ki khep haba don ki jingïalang ba ka Sorkar ka dei ban weng noh ïa ka jingkheiñ be-aiñ bad ïa ka jingbuh dak kum ka jingkheiñ be-aiñ bad ka jingkheiñ seng beaiñ shwa ba ka HNLC kan wan shakhmat na ka bynta ka jingïakren ïasuk. Hynrei ka paw kumba ka ka rynsan sainpyrthei kaba ka HNLC ka la pyrshang ban pyndonkam ka la pulom namarba ka Sorkar Jylla lymne ka Sorkar Pdeng kim shym la lah ban kren shai la yn weng noh neem ïa ka jingkheiñ seng be-aiñ ïa ka HNLC. Mynta ka paw bad sngewthuh ba ka HNLC ka shimkhia bha ïa ka jingïakren ïasuk bad dei na kata ka daw ba ka la pyrshang ban ïakhun ïa kane ka jingpynjlan ïa ka jingkheiñ seng be-aiñ da kaba leit sha ka ïingbishar.”
“Nga kyrmen ba ka bishar ka khadar, ka Sorkar Jylla bad Sorkar pdeng kin sngewthuh ba ka HNLC ka dang kwah dik dik ban wan shakhmat ban sdang biang ïa ka jingïakren ïasuk. Ka la phiel ha ka rynsan saiñpyrthei bad mynta ka seng ka la phai khmat da ka lynti jong ka jingbishar bad kyrmen ba ki kam ki jam kin ïaid beit nangne shakhmat,” u la bynrap.
