Shillong, Jylliew, 25: U Superintendent of Police ka East Khasi Hills Bah Vivek Syiem ha ka sngi Balang u la pyntip ba ka Special Investigation Team (SIT) ka la ïoh kurup ïa kawei ka pistol shna hi, ar tylli ki magazine bad ar tylli ki kuli .32 na wah.
Ka jingïoh kurup ïa kine ki tiar ka long da jingïalam jong u Silome James, uba la shah kem halor ka jingpynjulor ïa ki sakhi sabut ha kaba ïadei bad ka jingshah pynïap u nongjngohkai pyrthei na Indore u Raja Raghuvanshi ha Sohra, u la ong.
U SP u la ïathuh ba ka SIT ka la ïoh kurup ruh ïa ka pisa T.50 hajar na ka kali i10 jong u James kaba don ïa u nombar MP09WG 2352. Ïa ka pisa la lap ha ka pla thep laptop jong u Raj, ïa kaba ladep thang ingkhong.
Ïa ka laptop, la ïathuh ba la bret sha rud surok ha kaba ym shym la lap satia, la bynrap u SP.
U Bah Syiem u la pyntip ba u Silome James, uba dei u trai jong ka ïing ba la ai wai ïa ka ïing sha u Vishal Singh Chauhan, u dei uwei na kiba la shah kynnoh donkti ha kane ka jingjia bad arngut kiwei pat kiba la tip kyrteng kum u Balia Ahirwar, uba trei kum u security guard uba ap pahara ïa ka ïing mala bad u Lokendra Singh Tomar, uba sah ha Gwalior, Madhya Pradesh bad uba dei u trai ïing jong ka ïingmala ha Dewas Naka ba la riehtngen da ka Sonam Raghuvanshi, kaba dei ka nongshah kynnoh ba hakhmat eh ha ka kam pynïap briew.
Ïa kine ki lai ngut ki Pulit ki la ïohbor na ka Kashari ha Indore ban wanrah sha Shillong ha ka sngi Palei na ka bynta ban ïoh pynlong shuh shuh ïa ka jingtohkit kaba bniah.
