Shillong, Jymmang, 10: “Wan noh seh bahduh, i mei i ap ïa phi ha iing” kyrpad ka kmie ka Kong Brulina Marweiñ da ka jingïam pait dohnud kaba tmang bad pisa mynsiem ïa ka jingphet jong u khun na la iing.
La shi taiew kynthih ba u samla Sanborlang Marweiñ, 22 snem ka rta u khun jong u (L) Bah W. Diengdoh bad ka Kong Brulina Marweiñ kiba shong basah ha Mawtawar Laitlum, Lad Umjyrmut u la jah u khlem leit phai shuh sha la iing tad haduh kine ki sngi.
Halor ka jingjah jong une u samla, ki bahaïing hasem kiba la pyntip sha ki Pulit jong ka Mawkynroh Out Post ki la ïathuh ba u samla Sanborlang Marweiñ u la mih na la iing naduh ka por 8:15 baje mynstep ha ka sngi U Blei ka 4 tarik, Jymmang, 2025 khlem da pyntip shaei un leit bad ka mobile phone ruh u la iehnoh ha iing.
Tang shu ïoh jingtip halor kane ka jingjia, ki nongkitkam shnong jong ka Mawtawar bad ki paidbah ki la pynlong ka jingwad shnong hynrei haduh mynta kim shym la lap dien satia ïa u.
Ka Kong Brulina ha ka jingïakren bad u nongthoh khubor ka la ong, ‘shi taiew lynter u shu leh lynga. Hadien kata, u ong ïa nga, mei nga lynga nga pisa ka mynsiem bad nga sngew kumno re kumno ka met jong nga. Haba nga kylli, u ong ngam don samla. U ong beit ba u shu sngew lynga ka mynsiem bad ka shadem ruh ka sngew kum ban pait.”
Ka la ïathuh ba u la leit sah ruh sha iing jong u hymmen ar armiet. “Hynrei ha iing u hymmen ruh um sngew juh hynrei u ong ba un leit noh. Ynda nga kylli, u ong mei wat sahnud namarba ka Baibyl ha pla ruh nga don bad ka mobile ruh ka don ha kti. Lada don eiei nga sa phone ïa phi,” la ïathuh ka Kmie.
“Ngi la khroh ïa u ynda la poi (ha ka jingbuddien) haduh Kynton Massar. Ynda ngi la ong ban leit shim dawai ruh um treh hynrei u ong ba dei ban shu pynkhlaiñ tang ïa ka jingngeit. Ha iing ruh u pule beit ïa ka Baibyl. Nga ong beit ba un pule ïa ka Baibyl bad duwai shi kyntien ar kyntien lada ka wan ka jingsyier khnang ban dup ïohthiah. Shi sngi ar sngi, u dang pule ïa ka Baibyl bad u dang duwai hynrei ka jinglynga kaba kham jur ka long haduh saw sngi,” la ong shuh shuh ka Kmie.
“Haba nga ong ban leit shim dawai ruh um treh hynrei u ong ba beit ban shu duwai. Haba u duwai u da theh ka syep ka syar bad nga da ithuh ruh ïa kata ka jingïaleh kaba long kumba don ba teh mano re mano. Ha iing ngi la pynduwai la ar taiew,” la ong ka Kmie.
Ka la ïathuh ba ka la ïalam ïa u khun ban leit shah pynduwai ha Byrwa. “Ha ka por ba dang duwai nga ithuh ba u ïaksaid beit ïalade namarba u da kham ïa ki kti. Katba dang duwai u pastor um peit u khaprib beit ïa ki khmat. U pyrsad mynsiem katba u dang duwai.”
Haba kylli, ka Kong Marweiñ ka la ong ba ha ka sngi ba un mih na la iing u shu ïaid lynga shaneng.
Ka la ïathuh ruh ba u sngewthuh beit ban ïakren bad ha ka sngi kaba u mih na la iing u ïaid beit beit sharum bad u phet beit bak da kaba shu mareh khlem phai dien.
Ka la ïathuh ba ïa kane ka jingjia, ka la pyntip ruh sha ki bor pynïaid shnong jong ka shnong Mawkyllei, West Khasi Hills namarba ka Kong Marweiñ ka dei na kane ka shnong watla ka la shna ïa ka iing ban shong ban sah ha Mawtawar, Shillong.
U samla Sanborlang Marweiñ u don ïa ka rong snieh doh kaba byrsaw, ka rynieng 5phut tam eiei, u phong da ka jaket baiong thoh laiñ ksiar na kti, ka T-shirt rong grey, ka patlun traksuit rong iong ba thoh laiñ saw na kynriang bad u ïaid da ka kjat suda. U don ka tatoo ha ka kti ka diang hajan ka ‘tikmie bad u shñiuh ba khap rit.
Ka kmie ka la kyrpad ïa ki paidbah kiba lap ne ïohi ïa u khun jong ka kin pyntip ha u mobile number: 8787407632, Police Control Room: 6009196479, Incharge Mawkynroh Out Post: 9233139190, Incharge Missing Desk: 8837282114.
