Shillong, Nailur, 12: Ka Myntri Sorkar Pdeng ba dei khmih ïa ka tnad kam pla tyngka bad kam kompeni Nirmala Sitharaman, ka la pynïaid ïa ka jingïakren bad ki nongshim bynta ha Shillong mynta ka sngi, ha kaba ka la ïakren bad ki nongïalam jong ki kam khaii, ki nongseng kam seng jam, ki nongmihkhmat na ki karkhana, bad ki nongshong shnong. Ïa kane ka prokram la pynlong da ka sorkar Meghalaya ha ryngkat ka jingïatreilang bad Department of Financial Services (DFS), ka Central Board of Indirect Taxes & Customs (CBIC), bad ka Central Board of Direct Taxes (CBDT).
Ha kane ka jingïalang la don lang u Chairman ka CBIC u Sanjay Kumar Agarwal, u dkhot ka CBIC u Mohan Kumar Singh, bad ki heh ophisar na ka tnad pla tyngka, ka sorkar Meghalaya bad ki tnad ba ïa dei bad kane.
Ha ka jingithuh kaba kongsan, ka Sitharaman ka la ai khublei ïa ka kong Rimiful Shylla bad ka kong Wanjoplin, kiba dei napdeng ki kynthei nongsiew khajna ba pawkhmat jong ka Meghalaya, na ka bynta ka jingnoh synñiang kaba dei ban ai jingïaroh na ka bynta ka jingnoh synniang jong ki ha ka jingsiew khajna jong ka ri.
Ha kane ka jingïalang, ki nongshim bynta ki la ai jingai jingmut bapher bapher. Ki mat ba kongsan ki kynthup ïa ka jingdonkam ban pynthikna ïa ka rukom treikam kaba ïadei bad ka roi ka par kaba pynneh pynsah ïa ka mariang, ka jingdonkam ban kyntiew ïa ka jingwad bniah bad jingpynroi bad ka jingïarap pisa na ka bynta ki jaka treikam kiba don bynta ha ka jingwadbniah, bad ka jingpyrkhat kaba kham jylliew ïa ka polisi na ka bynta ka kam sah briew.
Ki nongïashim bynta ki la pynpaw ruh ïa ka jingdonkam ban wanrah ïa ki karkhana jong ki trai ri hapoh ka Targeted Champion Sector Scheme, ban pynïar ïa ka lad ban ïoh ram bad ki iew kiba kham bha na ka bynta ki startup bad ki MSME, khamtam kito kiba dei na ka thain shatei lammihngi, bad ban kyntiew ïa ki jingbei tyngka ka sorkar pdeng ban kyntiew ïa ka roi ka par jong ki karkhana ha ka thain. La pynpaw ruh ïa ki jingsngewkhia halor ka jinglut jingsep kaba heh ha ka liang ka jingpynpoi mar namar ki jingeh ha ka jaka jong ka thaiñ, da kaba khot ban pynbeit ïa ki jingïarap ha ka leit ka wan.
Ka Sitharaman ka la pdiang ïa ki jingai jingmut bad ka la pynskhem biang ïa ka jingkular jong ka Sorkar Pdeng ban synshar ha ka rukom kaba kynthup lang, kaba shimkhia, bad kaba ïahap bad ka thaiñ. Ka la pynpaw ïa ka jingdonkam jong ka jingthaw polisi kaba ïashim bynta lang bad ka la ban jur ba ka sorkar ka trei shitom ban pynbiang ïa ki rukom siew khajna bad ki rukom pynïaid pisa kiba kham suk bad kham biang na ka bynta baroh kiba ïadon bynta. Ka la pynshlur ruh ïa ka jingïatreilang hapdeng ki nongshong shnong, ki karkhana, bad ki nongthaw polisi kum ka lad ban ïatreilang ban thaw ïa ki buit kiba seisoh na ka bynta ka roi ka par.
Ban pynsuk ïa ka jingbuddien kaba la buh ryntih, ka Myntri Pla Tyngka ka la ai jingmut ba kum kine ki jingtyrwa bad ki jingeh ha ki kam bapher bapher dei ban pynpoi lyngba ki tnad bapher bapher bad ka tnad Development of North East Region (DoNER) na ka bynta ban bishar bniah bad leh ïa kaba biang. Ka la pynpaw biang ïa ka jingaiti jong ka sorkar pdeng ban ïatreilang bad ki sorkar jylla bad ki nongshim bynta ha ka thaiñ ban pynurlong ïa ka jingthmu na ka bynta ka thaiñ shatei lammihngi kaba riewspah, kaba neh bad kaba ïaid katkum ka jingsaindur thymmai.
