Shillong, Risaw, 05: Ar ngut ki rangbah ki la ïap hashen katba uwei pat u la mynsaw jur ha ka jingjia aksiden kaba shyrkhei kaba la jia ha ka janmiet Sngi u Blei ha surokbah National Highway-6 ha ka shnong Umsaw Nongkharai, Ri-Bhoi District.
Katkum ka jingtip ba la ïoh lum, la ong ba kane ka la jia ha ka por 8:00 baje eiei janmiet ha kaba kawei ka trok thylli kaba don ïa u Registration Number ML05 L-4368 kaba dang hiar sha ka thaiñ Nongpoh ka la ryngkoh na shilliang sha shilliang surok bad leit rat ïa kawei ka kali Bolero Sorkar kaba don ïa u Registration Number ML01 7455.
Katkum ka jingtip ba la ïohlum la ong ba ka kali Sorkar kaba la shah rat ka dei ka kali jong ka tnad Sports and Youth Affairs kaba dang kiew sha nongbah Shillong bad ha kane ka jingjia, ka kali Bolero ka la pra phum katba ka trok ka la kylla khongpong hapdeng surok.
Ki ar ngut ki rangbah kiba khlad noh hashen bad uwei pat uba la mynsaw jur ki dei kiba shong hapoh ka kali Bolero Sorkar bad ïa ka kyrteng jong ki ym lah satia ban tip.
Ki Pulit jong ka Nongpoh Traffic Police tang shu ïoh jingtip halor ka jingjia ki la leit mar mar ban ïarap sei ïa ka met jong ki ar ngut ki rangbah bad ban pynkit ïa uba mynsaw sha jaka sumar.
ïa u nongñiah trok la rah noh da ki Pulit sha thanad Nongpoh bad ka jingtohkit ka dang ïaid shakhmat.
